Daihatsu rikthen modelin Move pas dy vitesh pauzë

Pas një pauze dyvjeçare të shkaktuar nga një skandal sigurie që tronditi industrinë japoneze të automjeteve në vitin 2023, Daihatsu është rikthyer me modelin e ri Move.

Gjenerata e shtatë e këtij “kei car” të njohur sjell ndryshime të rëndësishme në dizajn, teknologji dhe funksionalitet, duke shënuar një fillim të ri për këtë model të dashur që nga debutimi i tij në vitin 1995, përcjell Telegrafi.

Modeli i ri ruan dimensionet kompakte të “kei car”, por vjen me një platformë të re (DNGA), ndarë me modelet Hijet dhe Atrai.

Risia më e dukshme janë dyert rrëshqitëse në pjesën e pasme, që shtojnë ndjeshëm praktikën dhe aksesin në hapësirën e brendshme – një veçori që ofrohet në të gjitha versionet, përveç modelit bazë L.

Estetikisht, Move ka marrë një pamje më moderne dhe më të rafinuar. Brendësia është e thjeshtë por funksionale, me mundësi për të palosur ulëset në mënyrë që të krijohet një hapësirë e sheshtë për pushime apo kampe të lehta.

Pajisjet teknologjike përfshijnë ekrane argëtimi me përmasa 7, 9 ose 10 inç dhe opsione si ngrohje e ulëseve, karikim wireless dhe sistemi i sigurisë Smart Assist.

Motori 658 cc ofrohet në dy variante: natyral me 52 kuaj fuqi dhe turbo me 64 kuaj fuqi, ndërsa të gjitha versionet përdorin transmision CVT dhe ofrohen në formate 2WD ose 4WD.

Modeli i ri Move ka dalë tashmë në shitje në Japoni me çmime që nisin nga ¥1,358,500 (rreth $9,500) dhe arrijnë deri në ¥2,044,000 (rreth $14,300) për versionin më të lartë me 4WD.

Daihatsu synon të shesë 6,000 njësi në muaj, të gjitha të prodhuara në prefekturën Oita në Japoni. /Telegrafi/