Coronavirusi në Indi: Si tortat e ditëlindjes dhe këngët i bënë policët, heronj të pandemisë

Inspektori Munish Pratap Singh ishte gati të përfundojë ndërrimin e tij rreth orës 22:00, kur një baba i pafuqishëm e thirri me një kërkesë të pazakontë.

“A mundesh, të lutemi të marrësh një tortë ditëlindjeje për djalin tim? Është ditëlindja e tij dhe ai është vërtet i trishtuar”, i kishte thënë babai.

Inspektori Singh nuk ishte mësuar të merret me kërkesa të tilla, por këto nuk janë kohë të zakonshme.

Të gjitha dyqanet ishin mbyllur në zonën e tij, por ai e thirri një furrë buke që ai e njihte dhe – për fat të mirë – një tortë ishte në dispozicion.

“Gëzimi në fytyrën e djalit e bëri gjithçka të vlefshme. Skuadra ime dhe unë harrova se sa ishim të lodhur”, thotë ai.

Por siç thuhet në një shkrim të BBC, përcjell Telegrafi, inspektori Singh nuk është i vetëm në mesin e kolegëve të tij me një veprim kaq të thjeshtë mirësjelljeje.

Shumë oficerë të tjerë në Indi u kanë shpërndarë ëmbëlsira për ditëlindje, fëmijëve dhe të moshuarve, duke u dhënë ushqim të pastrehëve dhe kanë siguruar ilaçe thelbësore për ata që kanë nevojë.

Ata janë parë gjithashtu duke kënduar këngë popullore në altoparlantë për të motivuar dhe argëtuar njerëzit.

Videot e gjesteve të tilla kanë shkuar virale në mediat sociale dhe në shumë vende, njerëzit kanë hedhur lule në drejtim të policëve.

Situata është shumë e ndryshme nga disa muaj më parë, kur policët e Indisë u përballen me akuza, madje për forcë të tepërt, korrupsion dhe abuzime të të drejtave të njeriut.

Por këto histori prekëse gjatë pandemisë së coronavirusit janë vetëm gjysma e tregimit: pas tyre janë më shumë histori të fshehura të vendosmërisë, detyrës dhe sakrificës, duke i bërë policët “luftëtarë të vijës së përparme” të betejës së Indisë kundër coronavirusit.

Ata janë duke bërë një sërë punësh: mbikëqyrur masat e bllokimit, gjurmimin e kontaktit, kontrollin e pikave, sigurimin e sigurisë në zonat me rrezik të lartë si spitalet, qendrat e karantinës dhe zonat e kontrollit, dhe jo vetëm.

Por ata kurrë nuk ishin trajnuar për këtë, thotë Vikram Singh, ish-shefi i policisë së shtetit më të populluar të Indisë, Uttar Pradesh.

“Ata ishin të trajnuar për ruajtjen e rendit dhe ligjit”, thotë ai, por kurrë për administrimin e një pandemie dhe të kuptuarit të protokolleve të sigurisë mjekësore.

“Pra, në këtë kuptim, ata janë duke bërë një punë të shkëlqyeshme, shpesh përballë sfidave të mëdha”, shton ai.

Dhe sfida kryesore është ekspozimi i tyre ndaj numrit të njerëzve që takojnë – posaçërisht oficerë të rangut më të ulët që janë jashtë në terren.

Si pasojë, më shumë se 1.000 policë kanë dalë pozitivë në testet për coronavirus në shtetin Maharashtra dhe të paktën katër kanë vdekur.

Në Delhi, ka më shumë se 100 raste të infektimit në mesin e policëve, dhe një 31-vjeçar ka vdekur.

Ai ka lënë pas një grua dhe një djalë të vogël, të cilët gjithashtu kanë dalë pozitivë.

Raporte të ngjashme kanë ardhur edhe nga shtete të tjera indiane gjithashtu. /Telegrafi/