Coronavirusi, Kina do të fillojë testimin e vaksinave te njerëzit në muajin prill

Autoritetet kineze po planifikojnë të fillojnë testimin e vaksinave njerëzore në prill, të krijuara kohët e fundit për t’u marrë me coronavirusin e ri, i cili ka rezultuar në 2.236 vdekje dhe më shumë se 76,000 të infektuar në të gjithë botën.

Xu Nanping, Zëvendës Ministri i Shkencës dhe Teknologjisë, ka thënë për Channel News Asia se studiues publik dhe privatë në të gjithë botën aktualisht po punojnë për të zhvilluar trajtime dhe vaksina që mund të lehtësojnë shpërthimin e coronavirusit që u shfaq në dhjetor në qytet nga Wuhan, në provincën Hubei, transmeton Telegrafi.

“Disa ekipe kërkimore janë duke testuar teknika të ndryshme për të zhvilluar një vaksinë të mundshme dhe pritet që vaksina e parë të kalojë në ekzaminime klinike në fund të prillit”, tha ai .

Kështu, ai shpjegoi se zhvillimi i vaksinave nga Kina po përparon “në të njëjtën kohë si në vendet e tjera”.

Organizata Botërore e Shëndetit (OBSH) paralajmëroi të martën se procesi për të aplikuar vaksinat në përpjekje për të frenuar coronavirusin mund të zgjasë një vit. Drejtori i përgjithshëm i organizatës, Tedros Adhanom Ghebreyesus, ka thënë se “vaksina mund të zgjasë midis 12 dhe 18 muaj”.

Qeveria e Kinës ka nisur pesë mënyra të ndryshme për të adresuar krizën shëndetësore, përfshirë zhvillimin e një vaksine, përdorimin e inxhinierisë gjenetike për të prodhuar proteina që veprojnë si antigjene ose modifikimin e vaksinave tashmë ekzistuese, siç është ajo e përdorur kundër Influenzavirus A.

Edhe pse epiqendra e coronavirusit është në Wuhan dhe shumica e rasteve janë regjistruar në Kinë, rastet janë zbuluar në vendet e tjera në Azinë Juglindore, Evropë dhe Amerikë. OBSH shpalli urgjencën ndërkombëtare shëndetësore në fund të janarit dhe i ka kërkuar bashkësisë ndërkombëtare të dyfishojë përpjekjet e saj. /Telegrafi/