Presidenti i vendit, Hashim Thaçi, ka deklaruar se në rast se deputetët e Kuvendit nuk e votojnë formimin e Ushtrisë së Kosovës, do të japë dorëheqje.

Thaçi po ashtu ka theksuar se Ushtria e Kosovës do të bëhet në koordinim me Shtetet e Bashkuara të Amerikës dhe Bashkimin Evropian.

Thaçi: Jap dorëheqje nëse Kuvendi nuk e voton Ushtrinë Thaçi: Jap dorëheqje nëse Kuvendi nuk e voton Ushtrinë

Lidhur me “premtimin” e tij për dorëheqje, njohësi i çështjeve politike, Blerim Burjani, ka thënë për Telegrafin se “Thaçi po ndihet i pasigurt” dhe se “ka bërë presion në Kuvendin e Kosovës dhe politikën ndërkombëtare me kërkesën për transformimin e FSK-së në Ushtri”.

“Për këtë arsye ka marrë këtë qëndrimin: ja hunin ja tirqit”, ka thënë Burjani.

Ai ka theksuar se kjo çështje tash është në duart e Kuvendit të Kosovës dhe se LDK-ja është ajo që po duket e brengosur dhe jo e guximshme.

“Thaçi duket të jetë i qëndrueshëm dhe stabil në politikën e tij që ta çojë deri në fund qëndrimin e tij sa i përket FSK-së, për dallim nga LDK-ja të cilën e ka kapluar frika për një veprim të njëanshëm – siç e kanë quajtur disa zyrtarë të këtij subjekti politik”, ka thënë Burjani, duke shtuar se duhet vazhduar komunikimet me partnerët strategjik, siç janë SHBA-të dhe NATO. /Telegrafi/