LAJMI I FUNDIT:

Bullgaria largon veton ndaj Maqedonisë së Veriut

Bullgaria largon veton ndaj Maqedonisë së Veriut

Me 170 vota për, 37 kundër dhe 21 abstenime, kuvendi bullgar sot ka larguar veton ndaj Maqedonisë së Veriut.

Kështu Kuvendi i Bullgarisë ka miratuar propozimin francez për tejkalimin e kontestit mes Shkupit dhe Sofjes, me disa propozim-ndryshime të caktuara të propozim teksteve të procesit negociues.

Kuvendi e autorizoi kryeministrin e shtetit Kiril Petkov që ta largoj veton për kornizën negociuese për Maqedoninë.

Me këtë vendim edhe ministrja për Punë të Jashtme në largim Teodora Gençovska ka marrë dritë jeshile që në emër të MPJ-së ta nënshkruaj Protokollin bilateral, të cilin së shpejti të dyja vendet duhet ta nënshkruajnë.

Kujtojmë se Samiti i djeshëm i BE-së me vendet e Ballkanit Perëndimor nuk solli pothuajse asnjë risi lidhur me largimin e vetos.

Bullgaria insistonte në pikat e caktuara të cilat ata i quanin si “problematika të çështjes”, ndërsa kryeministri i Maqedonisë së Veriut, Dimitar Kovaçevski tha se propozimi francez nuk është i pranueshëm.

Dje, Kovaçevski u shpreh se identiteti, gjuha dhe historia e Maqedonisë, janë vijat e kuqe të cilat Bullgaria nuk ka të drejtë ti bëj pjesë të negociatave.