Brovina: Jam konsultuar me familjarët për publikimin e fotografisë së gruas së dhunuar nga forcat serbe

Deputetja Flora Brovina ka thënë se për publikimin e fotografisë së gruas së dhunuar është konsultuar me familjarët e saj.

“Kam profesionin e etikës mjekësore që nuk më lejon të keqpërdori. Nuk jam humaniste në rang vendi por jam më shumë. E ruaj së pari nivelin tim të etikës dhe profesionit. Unë e di se deri ku mund të shkoj. Tek fotografia e gruas ju nuk do ta indentifikoni as familjarët as gruan por vetëm kriminelët sepse kam fshehur fytyrën e gruas dhe familjarëve. Unë nuk kam treguar as ku jeton gruaja. Familjarët e kësaj gruaje nuk mund të reagojnë sepse i kam konsultuar, i kam njoftuar, ata i kam kontaktuar dhe kanë thënë që është në rregull”, ka thënë ajo në Info Magazine.

Lexo po ashtu Publikoi një fotografi të dhunimit të një gruaje nga ushtarët serbë, Flora Brovina ka edhe dy dëshmi tjera

Brovina ka theksuar se edhe tek fotografia e vajzës e ka fshehur identitetin e saj.

“Sa i përket fëmiut unë ia kam fshehur mbiemrin dhe vendin ku ka ndodhur”, ka theksuar ajo.

Sipas saj reagimi i shoqatave është për interesa të ndryshme.

“Është i dhimbshëm i gjithë reagimi i shoqatave të ndryshme. Kanë interesa të ndryshme që nuk lidhen me mua”, ka theksuar ajo./Telegrafi/