Brahimaj: Nuk kam pranuar ende vendimin për shkarkim nga detyra e drejtorit të Kardiokirurgjisë

Rifat Brahimaj ka deklaruar se nuk ka pranuar dokument për shkarkim. 

Ndryshe raportohet se ai është shkarkuar nga detyra e drejtorit të Klinikës së Kardiokirurgjisë në QKUK. Sipas raportimit të KOHA-s, Brahimajt i është kumtuar ky lajm mëngjesin e së enjtes.

Megjithatë, ai në një prononcim për Telegrafin ka thënë se ende nuk e ka pranuar vendimin.

Brahimaj tutje ka deklaruar se në rast se e pranon shkresën zyrtare për shkarkimin e tij, do të dalë me një sqarim publik.

“Nuk e kam marr ende vendimin dhe nëse është ashtu do të dalë me një sqarim. Por, refuzoj të deklarohem derisa ende nuk e kam pranuar vendimin”, ka thënë ai.

Telegrafi ka provuar të kontaktojë edhe me zyrtarë në Shërbimin Spitalor Klinik e Universitar të Kosovës (SHKUK), por të njëjtit kanë qenë të paqasshëm deri në momentin e publikimit të këtij shkrimi.

Javën e kaluar një operacion i rrallë i kryer në Kardiokirurgji mori vëmendje të madhe. Kushtrim Shala, kirurgu i cili e kreu operimin, e shpërndau atë në rrjete sociale si të suksesshëm, megjithatë pacienti vdiq më pas.

Brahimaj për Telegrafin pati deklaruar se Shala ka kryer një operacion për të cilin është dashur përvoja të cilën nuk e ka pasur. Ai gjithashtu pati thënë se ka qenë në pushim në kohën kur ishte kryer operacioni, duke hequr përgjegjësinë nga vetja.

Lidhur me rastin për Telegrafin u patën deklaruar edhe nga ShSKUK-ja.

Në përgjigjen e tyre u tha se “të gjithë drejtorët e klinikave, spitaleve të përgjithshme dhe njësive tjera në kuadër të ShSKUK-së, disa herë janë të njoftuar përmes Urdhëresës, në formë të Qarkores Informative, nga menaxhmentet në të kaluarën, por edhe tani, se e kanë të ndaluar publikimin e shkrimeve, fotografive dhe materialeve tjera nga institucionet ku punojnë, pa autorizim paraprak nga Zyra për Medie dhe Marrëdhënie me Publikun në ShSKUK”. /Telegrafi/