BONEVET përmbyll donacionet e mburojave të fytyrës në kuadër të kampanjës “Bashkojuni Luftës”

Finalizimi me sukses i kampanjës për mbledhje të fondeve “Bashkojuni Luftës” në fund të muajit maj 2020, e cila mblodhi gjithsej 66,000.00EUR nga 134 mbështetës, lejoi që BONEVET të rrisë kapacitetin e prodhimit të mburojave të fytyrës, të destinuara për punëtorët shëndetësorë dhe të tjerë punëtorë publik të cilët vazhdojnë të ballafaqohen në vijën e parë me COVID-19.

Në mesin e muajit shtator 2020, me dhurimin e 17,338 mburojave të fytyrës, BONEVET lajmëron përmbushjen e qëllimit kryesor të kampanjës “Bashkojuni Luftës”.

Të gjithë punëtorët shëndetësorë në rajonet e gjithë Kosovës u pajisen me mburoja të fytyrës. Për më tepër, punëtorë të institucioneve publike si Dogana e Kosovës, Policia e Kosovës e shumë autoritete tjera lokale e qendrore përfituan mbrojtje shtesë nga virusi pandemik përmes mburojave të fytyrës të prodhuara me përkushtim nga ekipi i BONEVET.

Në kuadër të “Bashkojuni Luftës” fillimisht u planifikuar dhurimi i 15,000 mburojave të fytyrës, por me përkrahjen pasuese të Enhancing Youth Employment – EYE Project dhe Raiffeisen Bank Kosova u arrit rritja e numrit të lartpërmendur.

BONEVET i falënderon të gjithë mbështetësit e kampanjës “Bashkojuni Luftës”, veçanërisht Fondacionin “UNË E DU KOSOVËN”, KFOS, Ambasadën e Britanisë në Kosovë, UNDP Kosova, HELP Kosova, Shoqatën e Diasporës “Kaçaniku”, dhe Ministrinë e Financave dhe Transfereve.

Falënderim i veçantë̈, sipas BONEVET, i takon Federatës së Sindikatave të Shëndetësisë̈, përkatësisht Sindikatës së Punëtorëve Shëndetësorë të Rajonit të Gjakovës, që mundësuan shpërndarjen e mburojave të fytyrës për punëtorët shëndetësorë në tërë Kosovën.