Bislimi paralajmëron se Qeveria do të dalë me 10 masa për zbatimin e rregullores që e heq dinarin nga përdorimi

Zëvendëskryeministri Besnik Bislimi ka thënë se Qeveria e Kosovës në ditët në vijim do të dalë me listë prej 10 masave, me të cilën do të tregojë se si do të kujdeset që qytetarët të mos dëmtohen në fazën kalimtare deri te zbatimi i plotë i Rregullores së re të BQK-së, e cila ndalon përdorimin e dinarit serb.

Këtë Bislimi e ka bërë të ditur të mërkurën, teksa ka marrë pjesë në tryezën “Zhvillimi ekonomik për serbët në Kosovë”, të organizuar në Çagllavicë nga Qendra për Dialog Humanitar.

Lexo po ashtu Osmani me ambasadorët e QUINT-it diskutojnë për dinarin: Nuk po kërkohet shfuqizimi i Rregullores së BQK-së

“BQK-ja ka nxjerrë një varg të aktiviteteve dhe masave me të cilat synon të zbusë ndikimin e rregullores. Në ditët në vijim edhe Qeveria do të dalë me një listë prej 10 masave me të cilat do të tregojmë se si do të kujdesemi që qytetarët të mos dëmtohen në këtë fazë kalimtare, por që më pas do të garantonte zbatimin në plotni të formalizimit të sistemit të pagesave”, është shprehur zëvendëskryeministri.

Bislimi ka shtuar se janë “të vetëdijshëm” që “në afat të shkurtër zbatimi i kësaj mase mund të krijojë vështirësi për një pjesë të qytetarëve, të cilët kanë marrë dhe vazhdojnë të marrin mbështetje financiare nga Serbia”.

Sipas tij, rregullorja e BQK-së ka synim rritjen e sigurisë të sistemit bankar dhe sistemit të pagesave. /Telegrafi/