Biseda mpreh inteligjencën

Pse nuk është mirë të rrihet vetëm? Vetëm 10 minuta bisedë me një person tjetër, mund të ndikojnë që t’ju përmirësohet kujtesa dhe intelekti, pohojnë shkencëtarët nga Universiteti i Michiganit.

"Gjatë studimit tonë, shoqërimi me të tjerët është dëshmuar po aq i efektshëm sa edhe disa ushtrime tradicionale mentale për përmirësim e kujtesës dhe aftësisë intelektuale", shkruan Oscar Ybarra, psikolog nga U-M Instituti për Kërkime Sociale (ISR) dhe udhëheqës i hulumtimit, në të cilin kanë punuar psikologu i ISR-së, Eugene Burnstein, dhe psikologu, Piotr Winkielman nga Universiteti i Californias në San Diego.

Duke vlerësuar të dhënat e 3.610 personave, nga mosha 24 deri në 96 vjeçare, është vërtetuar lidhje në mes të nivelit të lartë të interaksionit shoqëror dhe funksioneve të zhvilluara kognitive.

Gjatë eksperimentit të dytë, shkencëtarët kanë kryer një test laboratorik për të vlerësuar se si interaksioni shoqëror dhe ushtrimet intelektuale ndikojnë në kujtesë dhe aftësi mentale.

"Kemi vërejtur që edhe interaksioni i shkurtër prej vetëm dhjetë minutash rrit aftësinë intelektuale njëjtë si përfshirja në, le ti quajmë, aktivitete intelektuale", ka thënë Ybarra.

Sa u përket rezultateve, duket që vizita e mikut apo e fqinjit mund të jetë po aq e rëndësishme për mprehtësinë e trurit si zgjidhja e fjalëkryqeve.

Ybarra ka theksuar se, izolimi shoqëror mund të ketë ndikim negativ në aftësinë intelektuale, si dhe në stabilitetin emocional të individit.