Beyonce kopjon Rita Orën?

Këngëtarja e madhe botërore, Beyonce, është në qendër të vëmendjes për videon e saj të fundit në Instagram, që shërben si një reklamë për markën e njohur të xhinseve, “Levi’s”.

Në këtë video, Beyonce mund të shihet teksa hyn në një lavanderi dhe zhvesh rrobat për t’i futur në lavatriçe, më pas ulet pranë dy vajzave dhe fillon të lexojë një gazetë derisa pret që rrobat e saj të pastrohen.

Sidoqoftë, ky koncept duket se është shumë i ngjashëm me videon muzikore të Rita Orës për këngën e saj “Ask And You Shall Receive”, që është publikuar në maj të këtij viti.

Në këtë klip, regjisor i të cilit është bashkëshorti i saj, Taika Waititi, Rita shfaqet gjithashtu në një lavanderi, ku ajo zhvesh rrobat e saj dhe i fut në lavatriçe, përpara se të ulet dhe të lexojë një revistë pranë një klienti.

Këto ngjashmëri të forta kanë shkaktuar spekulime në rrjetet sociale se Beyonce ka gjetur frymëzim në videon muzikore të artistes shqiptare me renome botërore.

Duke marrë parasysh se skenari i skenave është pothuajse identik, fansat e Rita Orës kanë shprehur shqetësim mbi këtë ngjashmëri.

Kritikat ndaj këngëtares Beyonce janë shtuar shumë së fundmi edhe për shkak të përfshirjes së saj dhe Jay Z në një aferë të diskutueshme që lidhet me P. Diddy, çka ka rezultuar në humbjen e miliona ndjekësve të tyre në rrjetet sociale.

Kjo situatë ka ngjallur debate mbi origjinalitetin në industrinë e muzikës dhe artit, duke vënë në pah se si ide të ngjashme mund të krijojnë tensione mes artistëve. Duket se, në këtë rast, është e qartë se inspirimi mund të vijë nga çdo vend, por është e rëndësishme që ky inspirim të respektohet. /Telegrafi/