Bayern Munichu ka fituar me rezultat të thellë 5-0 ndeshjen e tyre në shtëpi ndaj Fortuna Dusseldorfit, e vlefshme për javën e 29-të në Bundesliga.

Bavarezët kanë arritur edhe fitoren e katërt radhazi pas rikthimit të Bundesligas pas më shumë se dy muajve pas pezullimit shkaku i pandemisë së coronavirusit.

Pjesa e parë e ndeshjes u karakterizua me dominim të madh dhe raste të shumta të Bayernit, të cilët arritën të shënojnë edhe tri gola.

Goli i parë i ndeshjes erdhi në minutën e 15-të dhe ishte Mathias Jorgensen, i cili shënoi autgol për epërsinë 1-0 të Bayernit.

Benjamin Pavard (29’) arriti të dyfishojë epërsinë në 2-0, ndërsa Robert Lewandowski (43’) shënoi për 3-0.

Në pjesën e dytë, përsëri ishte Bayerni që dominoi dhe arriti të shënojë edhe dy gola për të siguruar fitoren e radhës.

Lewandowski (50’) shënoi për 4-0, ndërsa goli i Alphonse Davies në minutën e 52-të doli të jetë goli i rezultatit përfundimtar 5-0.

Pas kësaj fitore, Bayerni e sheh veten në pozitën e parë me 67 pikë apo dhjetë më shumë se Borussia Dortmundi i dyti me një ndeshje më pak.

Në ndeshjen e radhës, Bavarezët udhëtojnë te Bayer Leverkuseni, ndërsa Fortuna Dusseldorfi e pret Hoffenheimin. /Telegrafi/