Atika Ameti, 13 vjeçarja që ishte pjesë e “Skopje Fashion Weekend” me kreacionin e saj të parë

Intervistoi: Aroma Aliti

Dashuria dhe pasioni i saj për modën u kthye në një kreacion nga ajo, që u zgjodh të prezentohet në sfilatën e grupit të Izet Currit në Skopje Fashion Weekend. Ajo që veçohet më shumë është mosha e saj shumë e re për të arritur të krijoj një model të sajin në mesin e një koleksioni stilesh.

Ajo është 13 vjeçarja, Atika Ameti e cila përveç shkollimit të saj, vazhdon të ndjek traditën familjare të kësaj sfere. E intervistuar nga Telegrafi Maqedoni, Atika tregoi shumë rreth vetes dhe planeve të saj për të ardhmen në sferën e modës.

Mes tjerash ajo foli edhe për mesazhet dhe përkrahjen nga njerëzit për kreacionin e saj të parë, si dhe për vështirësitë në realizimin e gjithë kësaj. Për më shumë ju ftojmë të lexoni intervistën në vazhdim.

Kush është Atika për ata që se njohin?

Unë jam Atika Ameti jam 13 vjeçe, nxënëse e klasës së tetë në shkollën fillore Jahja Kemal, ndërsa ka një vit që i ndjek mësimet edhe në Institutin e modës Izet Curi.

Në një moshë kaq të re, ke realizuar sfilatën tënde të parë të modës, nga lindi kjo ide dhe si e arrite këtë?

Në fakt kjo nuk ishte sfilata ime e parë, por ishte krijimi im i parë si studente në Institutin e modës Izet Curi, unë kam krijuar një fustan i cili është përzgjedhur që të prezantohet në grupin e gjithë studentëve të Izet Currit në sfilatën e tyre në Skopje Fashion weekend dhe unë isha studentja më e re në moshë. Por sigurisht do punoj shumë deri në krijim e sfilatës time personale, ndërsa nuk e kam pas shumë të vështirë pasi unë kam ndjekur traditën e familjes time, mësimet e para i kam marr nga gjyshja dhe nëna ime.

Si u prit ky kreacion nga njerëzit, cilat ishin mesazhet e tyre?

Kam mar shumë mesazhe pozitive nga njerëzit, të gjithë më përgëzonin për krijimin tim dhe më kanë dhënë shumë përkrahje për të vazhduar më tej.

A ishte e vështirë për ty, të krijosh një model tëndin në mesin e një koleksioni fustanesh?

Sigurisht që nuk është e lehtë, por unë e dua shumë këtë punë, kam vazhdimisht ndihmën dhe përkrahjen e familjes, çdo herë konsultohem me nënën dhe gjyshen time, por tani që i ndjek mësimet edhe nga njerëz profesionist kam mësuar shumë dhe do punoj edhe në krijimin e shumë modeleve tjera.

Cilat janë planet e Atikës në të ardhmen?

Sigurisht prioritet janë mësimet në shkollë, por paralelisht do ndjek edhe mësimet tek instituti i modës dhe do punoj shumë pas mësimeve që të krijoj shumë modele të reja dhe një ditë të realizoj sfilatën time personale.

Çfarë këshille do iu jepje moshatarëve të tu?

Moshatarëve të mi do iu këshilloja të ndjekin ëndrrat e tyre, dëshirat e tyre dhe të punojnë fort për t’i realizuar ato.