Asociacioni i Komunave Shqiptare, ASH-ja: Propozim jo serioz, shqiptarët janë 1/3 e popullatës

Edhe Aleanca për Shqiptarët është prononcuar në lidhje me propozimin e Alternativës për krijimin e një asociacioni të komunave shqiptare në RMV, njëjtë siç e kërkon Serbia dhe ndërkombëtarët në Kosovë.

Nga ASH-ja thonë se ky propozim është joserioz dhe po përdoret vetëm për politika ditore nga Alternativa. Nga kjo parti shprehen se shqiptarët në Maqedoninë e Veriut jetojnë në vazhdimësi territoriale dhe se përbëjnë 30 për qind të popullatës në vend, nuk janë minoritet si serbët në Kosovë.

“Propozimin e tillë e vlerësojmë joserioz me tendencë që shqiptarët t’i vendos në trajtim të politikës ditore. Shqiptarët jetojnë në vazhdimësi territoriale dhe jo në enklava, në komuna ku shqiptarët janë shumicë absolute, në komuna me shumicë relative e në komuna me përqindje më të ulët. Organizimet politike dhe territoriale që nuk u shërbejnë atyre nuk meritojnë të diskutohen. Serbët në Kosovë ashtu si shqiptarët në Serbi janë minoritet dhe këto standarde duhet të kenë reciprocitet dhe këtë gjë ne e mbështesim në mënyrë absolute. Madje vlerësojmë se edhe hungarezët dhe boshnjakët e Serbisë duhet të kenë të drejta të tilla. Shqiptarët në Maqedoni janë 1/3 e popullatës së përgjithshme dhe jo pakicë. Zgjidhjet për mbrojtjen e pakicave të menduara për realitete tjera nuk mund të zbatohen në kontekstin e shoqërisë sonë multietnike dhe demokracisë konsociative.”- thuhet në komunikatën e ASH-së.