Arrest shtëpiak ndaj drejtorit të Shërbimeve Publike në Fushë Kosovë

Gjykata Themelore në Prishtinë ia ka caktuar një muaj arrest shtëpiak Maliq Berishës, drejtor i Shërbimeve Publike në Fushë Kosovë.

Lajmin për Telegrafin e ka konfirmuar zëdhënësja e kësaj gjykate, Mirlinda Gashi.

Lexo po ashtu Keqpërdori detyrën zyrtare – ndalohet për 48 orë drejtori i Shërbimeve Publike të Fushë Kosovës, Maliq Berisha

“Gjyqtarja e procedurës paraprake e ka refuzuar si të pabazuar kërkesën e Prokurorisë Themelore në Prishtinë për caktimin e masës së paraburgimit kundër të pandehurit M.B dhe të njëjtit i ka caktuar masën e arrestit shtëpiak.

Të pandehurit M.B  i është caktuar masa e arrestit shtëpiak në kohëzgjatje prej 1 (një) muaji, ndërsa në rast të mosrespektimit të masës së arrestit shtëpiak, gjykata mund të caktoj masën e paraburgimit për të pandehurin M.B”, ka thënë Gashi.

Maliq Berisha është ndaluar ditë më parë nën dyshimin se ka kryer veprën penale “keqpërdorim i autoritetit zyrtar”.

“Prokuroria Themelore në Prishtinë, njofton opinionin publik se Prokurori i Shtetit ka lëshuar aktvendim mbi ndalimin e M.B., Drejtor i Shërbimeve Publike në Komunën e Fushë Kosovës, për shkak të dyshimit se ka kryer veprën penale “Keqpërdorimi i pozitës apo autoritetit zyrtar”, sipas KPRK-së”, thuhej në njoftimin e Prokurorisë.

Tutje thuhej se ndaj të njëjtit do të ndërmerren veprime të mëtejme ligjore, si dhe për këtë çështje penale do të vazhdojë ndërmarrja e veprimeve hetimore në koordinim me Policinë. /Telegrafi/