Ancelotti e mbron vetëm një lojtar të Real Madridit pas disfatës ndaj Barcelonës

Carlo Ancelotti ishte një ndër figurat më të kritikuara teksa Real Madridi u mposht me rezultat të thellë nga Barcelona në finale të Superkupës së Spanjës.

‘Los Blancos’ nuk ia doli që ta fitojë titullin e parë të këtij viti në Jeddah pasi blaugranasit dolën fitimtar me rezultat 5-2.

Blaugranasit ishin ata që dominuan këtë ndeshje pothuajse gjatë tërë kohës teksa Ancelotti ngriti pikëpyetje për nivelin që shfaqën lojtarët e tij në atë sfidë.

“Ju duhet të mbroheni mirë për të fituar këto ndeshje. Barcelona e meritoi të fitonte, ata u mbrojtën më mirë se sa ne”.

“Skuadra nuk po duket mirë, por unë nuk do t’i drejtoj gishtin dikujt. Mbappe pati një ndeshje të mirë, ndoshta ai ishte më i mirë, shënoi një gol”.

“Nuk do të përmend ndonjë emër, por ne nuk ishim të mirë që nga minuta e parë dhe nuk u paraqitëm mirë”, ka thënë Ancelotti.

Italiani refuzoi të komentonte nëse kjo ndeshje do të kishte ndonjë ndikim në planet e tij për afatin kalimtar të janarit, pasi më parë kishte bërë me dije se nuk do të bëjë ndonjë lëvizje.

Real Madridi ka një kalendar të ngarkuar në vazhdim, duke përfshirë duelin ndaj Celta Vigos në Copa Del Rey në mesjavë dhe më pas dy ndeshje në Ligën e Kampionëve, ku do të vendoset fati i tyre i kualifikimit./Telegrafi/