Analistët parashikojnë rënien e Qeverisë Hoti, shkak mungesa e numrave në Kuvend dhe mospajtimet brenda koalicionit

Pothuajse asnjë ligj nuk është duke kaluar në Kuvendin e Kosovës edhe pse Qeveria e Kosovës vazhdimisht ka dërguar projektligje për ratifikim. E gjitha kjo është duke ndodhur pasi që në shumë seanca po mungojnë shumica e deputetëve.

Në lidhje me këtë në një prononcim për Telegrafin kanë folur analistët e fushës politike Ramush Tahiri dhe Artan Muhaxhiri, të cilët thonë se qeveria aktuale është e pa pushtetshme të çojë përpara agjenda dhe ta përmirësojë jetën e qytetarëve me projekte substanciale, andaj si rrjedhojë ajo duhet të bjerë ose koalicioni të merren vesh për shpërndarjen e Kuvendit të Kosovës.

Tahiri ka thënë se Qeveria Hoti do të bjerë pasi nuk ka vota të mjaftueshme për të miratuar ligje.

Sipas tij, kjo qeveri ka përçarje brenda koalicionit qeverisë, shkak pozita e presidentit.

“Mendoj që kjo qeveri do të bjerë sepse nuk ka vota të mjaftueshme për të miratuar ligjet. Ka kundërshtim me partnerin kryesor AAK-në si dhe mospajtime. Në këtë bazë kjo qeveri gjithsesi që do të bjerë, çështja është se a do të dorëhiqet Hoti apo do të merren vesh me partnerët e koalicionit për shpërndarjen e Kuvendit. Qeveria Hoti i ka humb votat në Kuvend dhe nuk e ka shumicën, dhe nuk mund të miratoj e të nxjerr ligje. Ka humb autoritetin e prezantimit ndërkombëtar edhe në dialog sepse ka përçarje mes AAK-së për pozitën e presidentit”, ka thënë ai.

Analisti, Artan Muhaxhiri ka thënë se aktualisht Kosova është në një gjendje politike absurde, pasi asnjëra nga të dyja mundësitë-vazhdimi i punës së Qeverisë ose shkuarja në zgjedhje të reja, nuk është e favorshme për shtetin dhe qytetarët.

“Aktualisht jemi në një gjendje politike absurde, pasi asnjëra nga të dyja mundësitë – vazhdimi i punës së Qeverisë ose shkuarja në zgjedhje të reja – nuk është e favorshme për shtetin dhe qytetarët”, ka thënë ai.

Ai tha se qeveria është e pa pushtetshme të çojë përpara agjenda dhe ta përmirësojë jetën e qytetarëve me projekte substanciale.

Siç tha Muhaxhiri, brishtësia e koalicionit bën që të zvogëlohet hapësira vendimmarrëse, rrjedhimisht edhe orientimet planifikuese dhe efektshmëria vepruese.

“Pasi e ka jashtëzakonisht të vështirë t’i mobilizojë 61 deputetë për ta kaluar secilin ligj në Kuvend, Qeveria duhet të vete censurohet në mënyrë që maksimalisht ta anashkalojë ballafaqimin me pafuqinë parlamentare. Kjo situatë stagnuese e shndërron në qëllim kryesor status quo-në dhe i redukton pritshmëritë e kosovarëve ndaj saj”, tha ai.

Sipas tij, çështja nuk është në rënien e Qeverisë sa në paqartësitë e skenarëve nëse një gjë e tillë eventualisht ndodh.

Muhaxhiri tutje ka theksuar se sorollatjet me fodullëk nëpër restorante dhe rezidenca janë më të rëndësishme për përfaqësuesit e fituesve zgjedhorë sesa arritjet e shpejta të marrëveshjeve.

“Përvojat e kaluara pas zgjedhore na rrëfejnë se sorollatjet me fodullëk multimedial nëpër restorante dhe rezidenca janë më të rëndësishme për përfaqësuesit e fituesve zgjedhorë dhe aleatëve të tyre sesa arritjet e shpejta të marrëveshjeve. Pasi edhe tash akterët janë të njëjtit, nuk ka asnjë shpresë për përmbylljen efikase të procesit pa vonesa të dëmshme të cilat do e vendosin shtetin në tehe të bllokadave zinxhirore dhe humnerave sistemike”, tha ai.

Ai ka potencuar se në këtë periudhë të eskalimit të pandemisë me COVID-19 është kriminale të kërkohen zgjedhje të reja nëse nuk ka plan të saktë për të gjitha hallkat e fillimit, zhvillimit dhe përfundimit të tyre.

“Nëse mjegullnajat e lojërave politike të kohëve të zakonshme aplikohen në periudhën e tanishme koronavirusore, ato bëhen instrument vrastar që merr shpirtra njerëzisht”.

Muhaxhiri po ashtu tha se papërgjegjësi e pozitës dhe opozitës po dëshmohet në mungesë të vullnetit për ta miratuar Ligjin për Rimëkëmbje Ekonomike.

“Papërgjegjësia spektakulare e pozitës dhe opozitës dëshmohet qartësisht në mungesën e vullnetit për ta miratuar Ligjin për Rimëkëmbjen Ekonomike.

Përkundër vonesës disamujore, edhe në seancat e tashme kur duhet të diskutohet kjo temë me ndikim jetik në mirëqenien e përgjithshme marrin pjesë vetëm nga 40 deputetë.  Është tragjike që njollat sociale të turpit dhe të keq bërjes politike shpërfillen si kritere të amoralitetit nga deputetët tanë, bile edhe në këto rrethana të krizave ekzistenciale”, ka thënë ndër të tjera, analisti Artan Muhaxhiri.

Ndryshe, edhe nga partia më e madhe opozitare Lëvizja Vetëvendosje (LVV) ka kërkuar që vendi të shkojë në zgjedhje të re parlamentare, pasi siç thonë ata vendit i duhet vendit i duhet një qeveri e re, legjitime./Telegrafi/