Amerikanja u trondit kur zbuloi se shtëpia që kishte blerë ishte e mbushur plot me gjarprinj

Një grua nga Kolorado që bleu një shtëpi për herë të parë në muajin prill e zbuloi disa javë më vonë se shtëpia ishte e mbushur me gjarpërinj.

Siç raportohet, 42-vjeçarja Amber Hall tha se u zhvendos në një shtëpi në qytetin Centennial me djalin e saj 13-vjeçar, vajzën 11-vjeçare dhe me dy qentë e tyre ‘retrievers’ Labrador në muajin prill dhe disa javë më vonë një nga qentë e saj e paralajmëroi atë për disa gjarpërinj që rrëshqitnin pas një mbajtëse në murin e garazhit, transmeton Telegrafi.

“Isha e tronditur”, tha Hall për The Washington Post. “Kam shumë frikë nga gjarpërinjtë”.

Ajo u shpreh se kapësit e gjarpërinjve kanë bërë vizita të shpeshta në shtëpi dhe kanë kapur rreth 30 prej tyre, që ishin gjarpërinj johelmues.

Gruaja deklaroi se shumica e gjarpërinjve janë gjetur në garazh, por se i ka parë gjithashtu edhe nëpër shtëpi.

Ekspertët thanë se ka gjasa të ketë një strofkë nën shtëpi ku gjarpërinjtë kanë jetuar për të paktën dy vjet.

Punëtorët e kontrollit të dëmtuesve thanë se do të duhej të copëtonin kuvertën dhe betonin përreth për të arritur tek strofka.

“Kapësi i gjarpërinjve më tha se gjarpërinjtë që ai kapi duken të jenë rreth 2 deri në 3 vjeç, kështu që beson se ata kanë qenë për një kohë të gjatë dhe ka shumë më tepër”, tha mes tjerash amerikanja. /Telegrafi/