Ambasadori i BE-së kërkon që zgjedhjet në veri të mbahen sa më shpejt: Pjesëmarrja e serbëve të mos kushtëzohet

Ambasadori i Bashkimit Evropian në Kosovë, Tomas Szunyog, ka mirëpritur iniciativën e qytetarëve për mbledhjen e nënshkrimeve për largimin e kryetarëve në Leposaviq dhe Mitrovicë të Veriut.

Përmes një reagimi në rrjetin social “X”, Szunyog iu ka bërë thirrje autoriteteve që të lejojnë grupet e qytetarëve që një gjë të tillë ta bëjnë edhe në Zubin Potok dhe Zveçan.

Lexo po ashtu Peticionet në veri, “përmirësim i gabimit” apo vullnet i qytetarëve

“I kënaqur të shoh serbët e Kosovës që përdorin të drejtën e tyre demokratike, të ofruar nga korniza ligjore e Kosovës, dhe kanë nisur me mbledhjen e nënshkrimeve të nevojshme për peticionin për shkarkimin e kryetarëve në Mitrovicë të Veriut dhe Leposaviq”.

“U bëjë thirrje autoriteteve të Kosovës në nivel qendror dhe lokal të ofrojnë gjitha dokumentet e nevojshme dhe të lejojnë grupet e qytetarëve të iniciojnë mbledhjen e nënshkrimeve edhe në Zubin Potok dhe Zveçan”, ka shkruar ambasadori i BE-së.

Ai tutje ka thënë se është e rëndësishme që të mbahen sa më shpejt zgjedhjet e jashtëzakonshme lokale në veri të Kosovës me pjesëmarrje të pakushtëzuar të serbëve të Kosovës.

Ndryshe, në dy komunat në veri të Kosovës, Mitrovicë dhe Leposaviq, të mërkurën ka nisur nënshkrimi i peticionit për shkarkimin e kryetarëve.

Në këto dy komuna, si dhe në Zubin Potok afati për mbledhjen e nënshkrimeve është deri më 22 janar e në Zveçan afati i fundit është 27 janari. /Telegrafi/

Pleased to see that Kosovo Serbs use their democratic right provided by #Kosovo‘s legal framework & started the collection of signatures needed for the recall petitions on the mayors in Mitrovica North and in Leposavić/Leposaviq (1/3)

— Ambassador Tomáš Szunyog (@EUAmbKS) January 18, 2024