Kompania Al Trade sot ka shënuar 21-vjetorin e themelimit, duke i rikujtuar sfidat e rrugëtimin e vështirë përgjatë dekadave, por njëkohësisht edhe suksesin e korrur me ndihmën e stafit të palodhshëm dhe punës së vazhdueshme.

Në një ceremoni të vogël solemne e simbolike, pronari i kompanisë, Sokol Gashani, ndau edhe Çmimin e Artë – çmim i cili u dedikohet personave të veçantë që kanë kontribuar për shtetin e Kosovës përgjatë periudhave të ndryshme kohore.

Këtë vit, ky çmim i shkoi grupit të njohur humoristik “Treshi Përsheshi”.

Rasim Thaçi–Cima, Sevdai Radogoshi–Qumili dhe familjarët e legjendës Ibrahim Krajkova–Leci, ishin ata që e pranuan Çmimin e Artë.

Me rastin e marrjes së çmimit, Rasim Thaçi-Cima u shpreh se është befasuar për të mirë nga ky çmim, duke shtuar se kompania “Al Trade” po i vlerëson artistët më shumë sesa vet shteti dhe institucionet shtetërore.

Në anën tjetër, Sevdai Radogoshi-Qumili është ndier i nderuar dhe e ka përgëzuar kompaninë për punën e lodhshme e profesionale që e bën, si dhe për kontributin që kompania e bën për shtetin dhe kombin shqiptar.

Bekim Krajkova, biri i Ibrahim Krajkovës-Lecit, e ka pranuar çmimin në emër të familjes duke theksuar se ndihet tejet krenar dhe i lumtur që kompania Al Trade po e rikujton babanë e tij për kontributin e dhënë.

Përndryshe, Sokol Gashani u ka bërë falënderim të veçantë mysafirëve dhe të gjithë stafit për punën e palodhshme përgjatë tërë këtij rrugëtimi.

Al Trade në anën tjetër ka hapur sot edhe dyert për vizitor, ku shumë njerëz e kanë pasur mundësinë ta shohin nga afër punën që bëhet nga stafi i kompanisë.

Nxënësit e gjimnazit “Hivzi Sylejmani” dhe ata të institucionit parashkollor “Linda” e kanë vizituar sot kompaninë bashkë me drejtorin Amir Pllana dhe mësimdhënësen Prof. Vlora Bekteshi.