AGK dënon sulmin fizik ndaj dy gazetareve: Prokuroria të ndërmarrë të gjitha veprimet e nevojshme

Asociacioni i Gazetarëve të Kosovës ka reaguar për një rast ku dy gazetare të portalit “Lajmi.net”, Fjolla Hyseni dhe Lindita Berisha, janë sulmuar fizikisht nga një çift në Prishtinë.

Në disa pamje shqetësuese të publikuara nga mediumi, shihet se si një grua dhe një burrë i sulmojnë gazetaret dhe tentojnë që t’ia ndalojnë xhirimin.

“Krejt kjo sipas mediumit, pasi që taksi në të cilin ndodheshin gazetaret ua kishte bllokuar rrugën atyre, dhe të njëjtit kishin filluar që ta sulmonin fizikisht taksistin”, thotë AGK-ja.

Për Asociacionin e Gazetarëve të Kosovës, sulmi fizik ndaj gazetareve Hyseni dhe Berisha është tejet shqetësues, i papranueshëm dhe kërcënim serioz për sigurinë e gazetarëve.

“Gazetaret dhe mediumi tashmë e kanë paraqitur rastin në Policinë e Kosovës, dhe AGK-ja e fton Policinë dhe Prokurorinë që të ndërmarrë të gjitha veprimet e nevojshme në mënyrë urgjente, për të adresuar sulmin që ka ndodhur”, ka thënë AGK-ja në këtë reagim.