Aktorja dhe deputetja e njohur shqiptare, Adriana Matoshi, i është rikthyer Kuvendit të Kosovës pas ndërhyrjes së kryer për largimin e tumorit në tru.
Ajo është parë në seancën e së premtes, ku është mirëpritur ngrohtë nga kolegët e saj të Lëvizjes Vetëvendosje, të cilët e kanë përshëndetur dhe uruar për tejkalimin me sukses të operacionit.
“Kësaj seance sapo i dha jetë më shumë deputetja që sapo arriti, Adriana Matoshi, deputetja jonë e nderuar. Ka kaluar nëpër një ndërhyrje kirurgjike të vështirë, por ia ka dalë jo vetëm pse vet është e fuqishme, po pse edhe në çdo moment e në çdo sekondë kemi qenë me ty. Kështu që, në emër të Kuvendit dhe të gjithë deputetëve të dëshirojmë shëndet dhe jetë të gjatë”, tha kryesuesi i seancës Glauk Konjufca, ndërsa kolegët nuk i kursyen duartrokitjet.
E veshur me një fustan të zi dhe me një shami me fjongo të hirtë, deputetja e Kuvendit të Kosovës është dukur mjaft bukur dhe atraktive gjatë seancës.
Adriana përndryshe iu nënshtrua operimit për largimin e tumorit në tru më datë 1 të këtij muaji.
Ajo njoftoi se pas nëntë vitesh kishte zbuluar se i ishte rikthyer tumori dhe se ishet gati t'i nënshtrohej kësaj ndërhyrjeje.
Në mbështetje të saj, një ditë para operimit në sheshin e Prishtinës u organizua një marsh me pjesëmarrjen e qytetarëve të shumtë dhe disa fytyrave publike, në tentim për t'u senzibilizuar me aktoren e mirënjohur.
Adriana Matoshi është zgjedhur deputete e popullit në zjedhjet e 14 shkurtit të këtij viti, pasi kandidoi në krah të Lëvizjes Vetëvendosje me numrin 60. /Telegrafi/
