Zvicra i bashkohet paketës së 15-të të sanksioneve të BE-së kundër Rusisë

Të hënën, më 23 dhjetor, Zvicra vendosi të “bashkohet” me paketën e 15-të të sanksioneve të Bashkimit Evropian kundër Rusisë dhe masat kufizuese kundër Bjellorusisë.

Kjo është bërë e ditur në faqen zyrtare të qeverisë zvicerane, siç raporton Ukrinform, përcjell Telegrafi.

Vendimi do të hyjë në fuqi më 24 dhjetor.

Sanksionet synojnë 54 individë, duke përfshirë anëtarë të ushtrisë, drejtues të lartë në kompani në sektorin e energjisë dhe individë përgjegjës për dëbimin e fëmijëve ose përhapjen e propagandës dhe dezinformimit.

Këta individë tani janë subjekt i ndalimit të hyrjes dhe kalimit transit në Zvicër.

Gjithashtu, janë sanksionuar 30 kompani dhe organizata, të cilat janë kryesisht kontraktorë rusë të mbrojtjes dhe kompani detare që transportojnë naftë bruto ruse dhe produkte të naftës.

Zvicra miratoi gjithashtu sanksione të BE-së kundër 26 individëve dhe dy organizatave nga Bjellorusia.

Siç është raportuar më parë, BE-ja miratoi paketën e saj të 15-të të sanksioneve kundër Rusisë më 16 dhjetor në përgjigje të agresionit të saj të armatosur kundër Ukrainës. /Telegrafi/