Zv.ministri Ilazi vizitë pune në Bruksel, takime në Komision dhe Parlamentin Evropian

Zëvendësministri për Integrime Evropiane, Ramadan Ilazi po qëndron në Bruksel.

Gjatë qëndrimit në Bruksel, zëvendësministri Ilazi, ka takuar zëvendëspresidenten e Parlamentit Evropian, Ulrike Lunacek njëherësh raportuese për Kosovën si dhe Eurodeputeten Tanja Fajon, raportuese për procesin e liberalizimit të vizave për Kosovën.

Po ashtu, sipas një njoftimi të kësaj ministrie, delegacioni nga Kosova ka takuar edhe drejtorin e Përgjithshëm të Drejtoratit për Zgjerim, Christian Danielson, si dhe ka zhvilluar takime bilaterale me zyrtarë të Qeverisë belge.

Po sipas njoftimit, gjatë këtyre takimeve delegacioni ka diskutuar për procesin e liberalizimit të vizave, zbatimin e MSA-së si dhe dakordimin e prioriteteve kyçe të agjendës evropiane të Republikë së Kosovës që do të mundësojnë vazhdimin e reformave dhe avancimin e marrëdhënieve midis Kosovës dhe Bashkimit Evropian.

Zëvendësministri Ilazi duke prezantuar prioritetet e Kosovës, ka thënë se deri në fund të këtij viti presim që të kemi vendimin final për liberalizimin e vizave, takimin e parë të Këshillit të Marrëveshjes së Stabilizim Asocimit si dhe nënshkrimin e marrëveshjes kornizë për qasje në programet e Bashkimit Evropian.

“Ne presim që Bashkimi Evropian, sikurse ka bërë deri tani, të vlerësoj pozitivisht progresin e Kosovës duke e shoqëruar me vendime meritore për liberalizimin e vizave në një të ardhme të afërt. Kosova është e përkushtuar të vazhdoj agjendën e reformave evropiane duke e shfrytëzuar MSA-në si platformë të duhur në këtë drejtim”, citohet të ketë thënë zëvendësministri Ilazi.

Bëhet e ditur se gjatë ditës delegacioni do të ketë takime në Drejtoratin për Punë të Brendshme të Komisionit Evropian si dhe me Kabinetin e Komisionerit për Zgjerim, Johannes Hahn. /Telegrafi/