Zonat perëndimore të Kosovës më të prekurat nga vërshimet, Mitrovica shpall gjendje emergjente

Instituti Hidrometeorologjik i Kosovës (IHK) ka bërë të ditur se sot, si pasojë e reshjeve të shiut, që janë duke vazhduar me intensitet të lartë, sidomos në disa pjesë të vendit, (pjesa perëndimore, veriperëndimore, veriore dhe qëndrore e Kosovës), disa lumenj kanë dalur prej shtretërve të tyre dhe janë duke shkaktuar përmbytje.

Sipas IHK, zonat më të prekura, janë ato në perëndim të vendit, sidomos disa vendbanime në komunat si: Pejë, Junik, Deçani, Klinë, Skenderaj, Mitrovicë, Zubin Potok, Leposaviç etj.

Instituti Hidrometeorologjik i Kosovës thotë se situata e tillë e krijuar ka shkaktuar vështirësi dhe probleme, si në rrëshqitje të dheut, mbyllje të kanalizimeve dhe vështirësi të qarkullimit, por edhe përmbytje të tokave bujqësore.

Situata e vështirësuar hidrometeorologjike, pritet që të vazhdoj dhe gjatë orëve dhe ditëve në vijim.

Për shkak të kësaj gjendje, kryetari i Mitrovicës Bedri Hamza ka shpallur gjendje të jashtëzakonshme.

Hamza ka theksuar se si rrjedhojë e reshjeve të pandërprera, është rënduar situata në përgjithësi, dhe në bazë të kompetencave dhe autorizimeve, kam marrë vendim që të shpallet gjendje të jashtëzakonshme në të gjithë territorin e komunës së Mitrovicës.

“Kryetari i Komunës së Mitrovicës Bedri Hamza, pas vlerësimit të gjendjes së shkaktuar nga reshjet e shiut dhe koordinimit me drejtorinë përkatëse ka formuar-aktivizuar Qendrën Operative Emergjente për Menaxhimin dhe Monitorimin e situatës së shkaktuar nga reshjet e shiut”, thuhet në njoftimin e Komunës së Mitrovicës.

Lexo po ashtu Gjendje e rëndë nga vërshimet në disa komuna të Kosovës, autoritetet bëjnë thirrje për kujdes

Ndërsa, ministri i Mbrojtjes, Armend Mehaj, ka thënë se pas reshjeve të mëdha që po vazhdojnë dhe vërshimeve në shumë komuna të vendit, autoritetet janë duke e monitoruar pandërprerë situatën në terren.

Ai ka bërë të ditur se Ministria e Mbrojtjes është në gatishmëri të plotë të reagojë, varësisht nga kërkesat për mbështetje të Agjencionit për Menaxhimin e Emergjencave./Telegrafi/