Zgjedhjet e 9 shkurtit – fushata e subjekteve politike e shoqëruar me akuza, gjoba dhe gjuhë të urrejtjes

Që nga fillimi i fushatës zgjedhore për zgjedhjet e 9 shkurtit, subjektet politike në Kosovë kanë intensifikuar aktivitetet e tyre, duke u përpjekur të tërheqin sa më shumë mbështetje nga qytetarët.

Për dy javë rresht, partitë kanë zhvilluar takime të shumta, tubime dhe aktivitetet tjera për të promovuar programet e tyre dhe për të kërkuar votën e qytetarëve për zgjedhjet e 9 shkurtit, transmeton Telegrafi.

Fushata zgjedhore ka nisur të bëhet gjithnjë e më e ashpër, me akuza të shumta mes partive politike. E për këto veprime subjektet politike po dënohen edhe nga Paneli Zgjedhor i Ankesave dhe Parashtresave.

Në javën që po e lëmë pas nga Paneli Zgjedhor i Ankesave dhe Parashtresave njoftuan se që nga fillimi i fushatës për subjektet politike janë shqiptuar disa gjoba, mijëra euro.

Në një përgjigje për Telegrafin, PZAP ka theksuar se:”totali i gjobave të shqiptuara ndaj subjekteve politike me vendimet e PZAP-it, deri më tani është 125,000.00 euro.”

Fushata zgjedhore, e cila do të zgjasë deri më 8 shkurt 2025, ka për qëllim të ofrojë një proces transparent dhe demokratik.

Kujtojmë se ditë më parë Demokracia në Veprim (DnV), tha se që nga fillimi i fushatës zgjedhore për zgjedhjet parlamentare të 9 shkurtit është vërejtur gjuhë nxitëse dhe e urrejtjes mbi baza politike, si në tubime politike, por edhe në komente në platforma online.

Në një konferencë për media më 18 janar, Eugen Cakolli nga DnV, tha se gjatë kësaj jave ka pasur përkeqësim të gjuhës së ashpër të përdorur në fushatë.

“Këtë javë kemi pasur ashpërsim e përkeqësim të gjuhës së përdorur në fushatë, me plotë 25 aktivitete gjatë monitorimit të së cilave janë raportuar raste të përdorimit të gjuhës së nxitjes apo urrejtjes, kryesisht mbi baza politike”, tha ai.

Zgjedhjet parlamentare do të mbahen më 9 shkurt 2025, ku në garë janë 28 subjekte politike dhe një kandidat i pavarur.

Këto do të jenë zgjedhjet e para të rregullta që Kosova mban që nga shpallja e pavarësisë më 2008. Deri më tani, në vend janë mbajtur një sërë zgjedhjesh të parakohshme. /Telegrafi/