Zemaj, ministrit Latifi: Injorimi i stafit mbështetës tregon paaftësi, uroj t’i keni përfunduar pushimet e gjata

Deputeti i Lidhjes Demokratike të Kosovës, Armend Zemaj u shpreh se mospagesa e profesionistëve shëndetësor prej tre muaj tregon për injorimin dhe paaftësinë e Qeverisë dhe mashtrimet që bëhet për të gjithë ata që duan të punojnë ndershëm.

Zemaj tha se uron që tashmë pushimet e gjata kanë përfunduar dhe ministri i Shëndetësisë, Rifat Latifi t’i kthehet përgjegjësive.

“Më shumë se 1 mijë e 200 profesionistë shëndetësor, staf mbështetës dhe personel, i angazhuar në menaxhim të pandemisë, kanë mbetur pa paga tash e tre muaj, çka është edhe më e keqja kanë mbetur edhe pa përgjigje zyrtare vetëm në ato rrugë joformale që tash ka humbur edhe adresa e MSh-së dhe Qeverisë së Kosovës. Puna e tyre me përkushtim, pa pushim edhe ditëve të vikendit në menaxhim efikas me mburrje nga Qeveria e Kosovës, sidomos në procesin e vaksinimit dhe tash me injorim ndaj tyre tregon paaftësinë, por mbi të gjitha tregon edhe mashtrimin që iu bëhet gjithë atyre që dëshirojnë që punën e tyre ta kryejnë me nder dhe përgjegjësi më të lartë“, theksoi ai, raporton kp.

Ish-ministri Shëndetësisë e ka quajtur shqetësues edhe rritjen e listës së pritjeve të pacientëve për të marrë shërbime shëndetësore në QKUK.