Zëdhënësi i PDK-së: LVV e paaftë, e papërgjegjshme dhe mashtruese

Zëdhënësi i PDK-së, Avni Bytyçi, ka reaguar ndaj justifikimeve të zyrtarëve të Vetëvendosjes për gjoja pengesat që po i kanë për formimin e institucioneve.

Bytyçi vlerëson se partia e Albin Kurtit po dëshmohet çdo ditë se është parti mashtruese, e papërgjegjshme dhe e paaftë të udhëheqë me shtetin e Kosovës.

“Paaftësinë e saj për ta formuar koalicionin qeverisës, Lëvizja Vetëvendosje sot ia paska adresuar një formacioni politik imagjinar.

Partia e Albin Kurtit, jo vetëm është e paaftë, por është edhe e papërgjegjshme dhe mashtruese. Partia Demokratike e Kosovës, si parti opozitare, e fton LVV-në që të pushojë me këto lojëra fëmijërore, sepse bëhet fjalë për shtetin e Kosovës, e jo për ndonjë forum të tyre politik. Le ta formojë Qeverinë sa më parë, edhe pse, siç po shihet, Kosova dhe shoqëria e saj nuk do të përfitojnë asgjë”, ka shkruar Bytyçi, njofton Telegrafi.

Lexo po ashtu Zëdhënësi i LVV-së: Do të ishte naivitet po të mendohej se koalicioni do bëhej me lehtësi

Ky reagim i këshilltarit të Kadri Veselit vjen pikërisht pas disa deklaratave të zyrtarëve të Vetëvendosjes të cilët sot gjatë ditës janë deklaruar se shteti i kapur nga partitë që kanë udhëhequr me shtetin po u pengon ta formojnë Qeverinë.

Zëdhësi i PDK-së e ka ftuar me këtë rast Vetëvendosjen që ç’kapjen e shtetit ta filloj nga Komuna e Prizrenit ku LVV qeverisë, e ku siç ka shkruar Bytyçi, gjysma e kabinetit është nën aktakuza për korrupsion dhe abuzim të detyrës zyrtare.