Zbulohen fituesit e çmimit më të madh të lotarisë në Mbretërinë e Bashkuar – shuma e parave dhe si burri ia dha lajmin gruas së tij

Fituesit e çmimit të madh të lotarisë “EuroMillions” në Mbretërinë e Bashkuar janë zbuluar si një çift nga Gloucester, i cili mori 184 milionë funte (rreth 217 milionë euro) nga një tiketë me fat.

Sipas mediave të huaja, përcjell Telegrafi, Joe dhe Jess Thwaite fituan një rekord prej 184,262,899 £ – duke i bërë ata më të pasur se shumë figura publike – javën e kaluar.

Jess, 44, e cila ka dy fëmijë me Joe, 49, tha se fitorja do t’u japë atyre “kohë për të ëndërruar”.

Rekordi i mëparshëm mbahej nga një fitues anonim, i cili siguroi 170 milionë funte (rreth 200 milionë euro) në tetor të vitit 2019.

Z. Thwaite zbuloi se kishte kuptuar se ishte fituesi kur u ngrit për të shëtitur qentë në orën 05:15 të martën e kaluar.

Ai shpjegoi se kur e kuptoi se sa kishte fituar ai “nuk dinte çfarë të bënte”.

“Nuk mund të kthehesha për të fjetur, nuk doja ta zgjoja Jess, kështu që u shtriva”, ka rrëfyer ai, përcjell Telegrafi.

Kur alarmi i gruas së tij ra, Thwaite i tha asaj: “Kam një sekret, kam diçka për të të thënë”.

Zonja Thwaite zbuloi se reagimi i saj fillestar ishte me mosbesim dhe vendosi të vazhdonte me rutinën e saj përpara se çifti të konfirmonte fitoren rekorde me operatorin e Lotarisë Kombëtare Camelot.

Ata thanë se fitorja do t’u jepte atyre “kohë për të ndarë shumë përvoja dhe për të shkuar në aventura me familjen dhe miqtë”.

Fitorja do t’i japë çiftit paratë e nevojshme për të bërë punën e nevojshme në shtëpinë “e ëndërruar” në të cilën u vendosën së fundmi.

“Si shumë prindër, ne zgjohemi për t’u dhënë fëmijëve tanë gjithçka që mundemi”, shtoi ajo. /Telegrafi/