Kryeministri i Kosovës, Albin Kurti, ka njoftuar se ka themeluar Fondin e Sigurisë, duke ftuar qytetarët e Kosovës dhe bashkatdhetarët tanë në diasporë por edhe donatorë të tjerë të kontribuojnë për sigurinë shtetërore.

Analistët në “Debat Plus” me Ermal Pandurin në RTV Dukagjini kanë qenë të ndarë sa i përket këtij vendimi të Kurtit.

Ish-deputeti Visar Ymeri thotë se nuk ka asgjë të keqe nga nisma e Qeverisë për të shtuar kapacitetet e mbrojtjes.

Megjithatë ai mendon se Kosova nuk mund të mbrohet e vetme.

“Ne si Kosovë sigurinë duhet ta shohim të ndërlidhur me shtetet e NATO-s, veçanërisht Amerikën e Shqipërinë, pasi si të vetme nuk mund të sigurojmë shpejt kapacitete që mbrojmë vendin. Si nismë është e mirë”.

Ymeri megjithatë ka kërkuar më shumë transparencë për fondin pasi sipas tij nuk është fondi i parë që po formohet.

“Unë së paku nuk e di se ku kanë shkuar dhe sa para janë mbledhur nga Fondi për Pandeminë”.

Ish-deputeti thotë se megjithatë kapacitetet ushtarake duhet të rriten nga fondet shtetërore.

“Në vendet demokratike ushtritë ndërtohen nga fondet shtetërore. Ideja për ushtri popullore më shumë janë të sistemeve të kaluara apo ide bolshevike”, deklaroi tutje Ymeri./Telegrafi/