LAJMI I FUNDIT:

Xërxa nga Telegrafi Jobs: Kjo platformë është ura lidhëse ndërmjet punëdhënësit dhe punëkërkuesit

Xërxa nga Telegrafi Jobs: Kjo platformë është ura lidhëse ndërmjet punëdhënësit dhe punëkërkuesit

Telegrafi Jobs është platforma më unike në tregun e Kosovës që shërben si urë lidhëse ndërmjet punëdhënësit dhe punëmarrësit.

Kështu ka thënë menaxheri i Telegrafi Jobs, Brezar Xërxa duke shtuar se kjo ndihmon në gjetjen online të njeri-tjetrit.

“Telegrafi Jobs fillimisht ka filluar si pjesë e Telegrafit dhe duke i ndjekur trendët e teknologjisë, e kemi parë të nevojshme të krijojmë një platformë në mënyrë që t’iu ndihmojmë punëdhënësve dhe punëkërkuesve që ta gjejnë njëri-tjetrin. Pra, kjo ka qenë ideja që të jemi në trend”, tha Xërxa në sesionin informues “Gjetja e punës përmes platformave online” prezantuar nga DIMAK dhe GIZ.

Ai tregon se ashtu si punëdhënësi dhe punëkërkuesi mund ta krijojnë me lehtësi një profil për t’i menaxhuar konkurset dhe aplikimet për punë.

“Së pari në Telegrafi Jobs krijohet një profil i kompanisë, ku përparësia te ne është që me anë të një profili bëhet menaxhimi i disa kompanive, ku pastaj punëkërkuesit e kanë shumë të lehtë për të krijuar një CV, ku i gjithë ky proces merr shumë pak kohë, jo më shumë se 2-3 minuta. Ideja e kësaj është që të bëhet sa më shpejtë shpallja e konkursit”, tregon ai.

Xërxa thekson se mosha mesatare e atyre që aplikojnë për punë fillon nga 18 vjeç deri në 24 vjeç.

“Ekosistemi ynë i punësimit, ku në bazë të bashkëbisedimeve joformale me klientët apo partnerët tonë, më shumë është nëpërmjet ueb-faqes dhe normal edhe rrjetet sociale e kanë rrolin e vet. Mosha mesatare mund të jetë fillimi i 18 vjeç deri në 23 apo 24 vjeç, sepse është fillimi i karrierës”, thekson Xërxa.

“Qëllimi i Telegrafi Jobs është t’i bashkoj punëdhënësit me punëkërkuesit, pastaj se çfarë ndodh më tutje është punë e tyre. Krejt ideja ka qenë që ne të jemi ura lidhëse për ta ndihmuar njëri-tjetrin”, shton ai.

Sipas tij, teknologjia informative është profesioni që kërkohet më së shumti në Kosovë, nëpërmjet platformës.

“Duke u interesuar për t’u aftësuar më shumë në bazë të tregut që e kërkon për punë, edhe punëkërkuesit janë vetëdijesuar për të qenë më të aftë për pozitat e punës. Në sistemin tonë gjendet pjesa për krijimin e CV-së, është shumë e lehtë dhe përmes një kohe të shkurtër mund të aplikoni aty, që të dalin më të përgatitur aty. Shumica e profesioneve kërkohen në Kosovë, por më shumë është teknologjia informative, ndjekur nga dizajni”, tha ai.

Në fund, sipas Xërxës ata që aplikojnë për pozitat e punës duhet të investojnë më shumë në aftësitë e tyre.

“Punëmarrësit duhet të investojnë më shumë në aftësitë e tyre, sidomos në ato bashkëkohoret dhe të informohen më shumë se çka po kërkohet e t’i rrisin aftësitë për të aplikuar”, ka përfunduar Xërxa. /Telegrafi/