Vuçiq thotë se Serbia po i furnizon dyqanet në veri të Kosovës

Presidenti serb Aleksandar Vuçiq ka deklaruar sot se është i kënaqur, sepse gjatë ditëve të fundit Serbia ka arritur të furnizojë me mallra dyqanet në veri të Kosovës.

“Nuk është gjithmonë lehtë dhe besoj se do të sigurojmë që njerëzit të mos jenë të uritur dhe të etur, por të kenë një jetë normale”, tha Vuçiq, pas vizitës së fëmijëve të shkollave fillore nga veriu i Kosovës, në Presidencën e Serbisë.

Siç raporton “Beta”,  përcjell Telegrafi, Vuçiq ka thënë se “kriza [në veri të Kosovës] vazhdon, por në një masë shumë më të vogël, sepse shumë punë është bërë në ditët e fundit”.

“Shpresoj se ditëve në vijim do t’ia dalim të kryejmë furnizime shtesë me mallra të konsumit të përgjithshëm edhe dyqanet e tjera, në tërë Kosovën”, tha ai.

Vuçiq paralajmëroi se gjatë shtatorit ose tetorit do ta vizitojë Kosovën.

Presidenti serb ka pritur sot në Presidencë në Beograd 31 nxënës të shkollave fillore nga dy komuna të pjesës veriore të Kosovës.

Vuçiq u tha fëmijëve serbë nga Kosova se Beogradi është kryeqyteti i tyre dhe se do të mbetet gjithmonë. /Telegrafi/