Këngëtarja Maria De La Rosa 22 vjeçe, u vra tragjikisht në një sulm me armë zjarri në Los Angeles, të cilin policia e përshkruan si një “pritë”.
Dy persona të tjerë u plagosën rëndë në sulmin, i cili ndodhi të shtunën, më 22 nëntor, raporton People.
Sipas një deklarate nga Departamenti i Policisë së Los Angeles, ata morën një telefonatë emergjente nga lagjja Northridge rreth orës 1:25 të mëngjesit sipas kohës lokale.
Dëshmitarët thanë se dy burra të panjohur iu afruan makinës së parkuar dhe hapën zjarr, duke qëlluar disa herë.
De La Rosa u dërgua me urgjencë në spital, por mjekët nuk mundën ta shpëtonin. Dy viktimat e tjera mbeten në gjendje kritike.
Policia po kërkon intensivisht autorët, por deri më tani askush nuk është arrestuar. Motivi i sulmit është ende i panjohur dhe hetuesit po mbledhin pamjet e kamerave të mbikëqyrjes dhe po flasin me dëshmitarët në kërkim të të dhënave që mund të hedhin dritë mbi rrethanat e krimit.
