Deputetja e partisë liberale gjermane (FDP), Renata Alt dhe anëtare e Komisionit të Jashtëm të Bundestagut shprehet një reagim ekskluziv për Deutsche Wellen pas përfundimit të zgjedhjeve parlamentare në Malin e Zi, ku partia Demokratike e Socialistëve e presidentit Milo Gjukanoviq ka pësuar humbje të ndjeshme.

Rezultati zgjedhor për deputeten liberale tregon pakënaqësinë në vend.

“Humbjet e ndjeshme për partinë DPS të Milo Gjukanoviq, tregojnë se sa e madhe është bërë pakënaqësia mbi stilin autoritar të tij. Së fundmi ai përmes vendimit për Ligjin e kontestuar të Kishës, ka mobilizuar qytetarët e rinj dhe ortodoksë në vendin thellësisht të përçarë në favor të partive opozitare”, tha Alt.

Raportuesja e grupit parlamentar liberal për Ballkanin Perëndimor, bën edhe një parashikim për të ardhmen politike të Gjukanoviqit.

Rezultatet paraprake të zgjedhjeve tregojnë për garë të ngushtë ndërmjet Gjukanoviqit dhe opozitës pro-ruse Rezultatet paraprake të zgjedhjeve tregojnë për garë të ngushtë ndërmjet Gjukanoviqit dhe opozitës pro-ruse

“Ajo që e kërcënon atë, është një bashkëjetesë e pakëndshme me një qeveri të re armiqësore ndaj tij. Por nëse aleanca pro-ruse e Frontit Demokratik do të bjerë në ujdi me të dyja aleancat pro-evropiane për një program qeverisës është më shumë se e pasigurt”, tha ajo.

Dyshime deputetja liberale shpreh edhe për orientimin properëndimor të një qeverie të re.

“E dyshimt është, nëse një qeveri e tillë, do ta drejtojë vendin në shinat e duhura. E rëndësishme është, që BE të heqë dorë nga rezervimi i saj për deficitet demokratike në Mal të Zi. Paraqitja si kryesuese në procesin e integrimit vetëm krijon iluzionin e demokracisë në vend. Kjo nuk duhet dhe nuk ka si të jetë në interes të BE”, thekson deputetja liberale, Renate Alt në reagimin e saj pas zgjedhjeve në Mal të Zi. /Deutsche Welle/