Veteranët ende pa përgjigje për propozimin e Kurtit

Një letër nga kryeministri Albin Kurti, tashmë ka arritur në selinë e Organizatës së Veteranëve të Luftës së UÇK-së.

Aty, si shef qeverie Kurti ka propozuar dy alternativa për veteranët, në mënyrë që të ndalen protestat kundër ligjit për pagën minimale.

Propozimet i kanë marrë veteranët, porse thonë se nuk i kanë shqyrtuar ende.

Por, për një gjë janë të sigurt.

Propozimi për hartimin e një ligji për verifikim të veteranëve, sipas Faton Klinakut, është ndërhyrje në një proces gjyqësorë që është kthyer në rigjykim.

“Qëndrimi i jonë ka qenë dhe është që ne do të bëjmë protesta nëse ky ligj i pagave shkon në Kuvend pa ndryshim. Ne nuk e kemi shqyrtuar ende me Kryesinë këtë shkresë. Pasi ta shqyrtojmë do të ua kthejmë qeverisë. Në atë shkresë që ka ardhur ka ndërhyrje në procesin gjyqësor”, ka thënë Klinaku.

Ndonëse jo OVL-së së UÇK-së, hartimin e një ligji për riverifikim të veteranëve, Albin Kurti ia kishte përmendur Kryetarit të Këshillit për Mbrojtjen e të Drejtave të Luftëtarëve të UÇK-së.

Një gjë të tillë e pohon Xhevdet Qeriqi, veçse ai nuk është në favor të një iniciative të tillë.

Lexo po ashtu Kurti ua dërgon shkresën veteranëve, propozon ligj të ri për verifikimin e pjesëmarrësve në luftë

“ Po unë kom pas dy takime më Kryeministrin Kurti ma herët dhe e kemi diskuar riverifikimin e veteranëve por deri më tash s’kemi asgjë konkrete. Ne jemi të vendosur që të zbatohet ligji në fuqi dhe veteranet e luftës të trajtohen për paga mbi këtë ligj”, ka thënë Qeriqi.

Kundër propozimit të Kryeministrit Albin Kurti, janë shprehur edhe partitë opozitare.

Sipas Pal Lekajt nga AAK-ë, propozimi i bërë është injorancë ndaj atyre që sakrifikuan edhe jetën për liri.

“Kjo është injoranca më e madhe që i bëhet veteranëve që falë tyre dhe sakrificës ne e gëzojmë lirinë dhe kjo shkresë është për tu çuditur. Zoti Kurti nuk po do me krye punë pasi e di që procesi është në Gjykatë, por kjo është për të fituar kohë dhe është një injorancë ndaj vlerave të luftës”, ka deklaruar Lekaj.

Gjatë muajit qershor, qindra veteranë të UÇK-së, kanë protestuar para Kuvendit dhe Qeverisë së Kosovës për të shprehur pakënaqësinë me miratimin në lexim të parë të ligjit që e përjashton kategorinë e tyre nga rritja e pagës minimale./RTV Dukagjini/