Vetëm për ushqim nevojitej më shumë se një rrogë minimale në Maqedoni

Shporta minimale në muajin gusht për një familje katëranëtarëshe ishte 48.234 denarë, thonë nga Lidhja e Sindikatave të Maqedonisë. Prej atje shtojnë se edhe pse gjithnjë e më shumë punëtorë janë duke punuar, megjithatë nuk mund t’i sigurojnë produktet ushqimore bazë.

Sipas të dhënave të fundit, një familjeje që jeton në shtëpi prej 50 metrave katrorë dhe nuk posedon veturë, vetëm për produktet bazë i nevojiteshin 41.295 denarë, por me rritjen e inflacionit prej 16,8% kjo shumë shënoi rritje për 6.937 denarë. Në këtë përllogaritje nuk janë përfshirë shpenzimet e materialeve të nevojshme për fillimin e vitit shkollor për një nxënës, për të cilin duhet të ndahen 6.000 denarë shtesë. Nga LSM-ja thonë se vetëm për ushqim nevojitet më shumë se një pagë minimale.

“Sipas të dhënave, vetëm për ushqim dhe pije ku janë përfshirë 63 produkte, të cilat nuk i shprehin nevojat e plota për ushqim, por i shprehin mundësitë, shprehitë dhe traditën në ushqim, ndërkaq vlera e të njëjtave nuk merret si mesatare, por si vlerë minimale, u nevojitën 18.324 denarë apo për 324 denarë më shumë se rroga minimale”, thonë nga Lidhja e Sindikatave të Maqedonisë.

Edhe të dhënat e Entit Shtetëror për Statistikë thonë se kostoja e jetesës dhe indeksi i çmimeve me pakicë shënojnë rritje në gusht në krahasim me muajin paraprak. Rritje më të madhe ka te buka, e cila vetëm në muajin gusht është rritur për 6.4%, ndërsa për një vit rritja e çmimit arrin deri mbi 44%.

“Rritje e indekseve të kostos së jetesës në gusht të vitit 2022, krahasuar me muajin paraprak është shënuar te buka dhe drithërat edhe atë për 6,4%, frutat e freskëta dhe të ftohta për 3,8%, te qumështi për 3,6%, mishi për 2,5% dhe te produktet e tjera ushqimore për 1.8%”, thonë nga ESHS.

Nga LSDM thonë se Qeveria po punon me përgjegjësi dhe përkushtim, sidomos në drejtim të tejkalimit të krizës energjetike.

“Çmimi i energjisë elektrike për përdoruesit përfundimtarë, përkatësisht për amvisëritë, do të vazhdojë të subvencionohet nga shteti në lartësi prej 80%. Krahas kësaj, po ndërmerren zgjidhje afatgjata për rritjen e prodhimit të energjisë elektrike dhe uljen e varësisë nga importi i rrymës. Me ndryshimet ligjore, çdo çati do të bëhet një mini elektranë, duke vendosur panele fotovoltaike, gjë për të cilën procedura është shumë e thjeshtësuar”, theksoi Bogdanka Kuzeska, zëdhënëse e LSDM-së.

Kriza globale energjetike këtë dimër pritet të jetë ndër më të rëndat, e këtë e paralajmëron edhe Qeveria e RMV-së./TV21/