Vendimi për liberalizimin e vizave, arrestimi i drejtorit të KEK-ut dhe deklarata e Konjufcës për mungesën e kuorumit – top lajmet e javës

Javën që po lëmë pas Parlamenti Evropian miratoi vendimin për liberalizimin e vizave, vendim ky i pritur me vite të tëra nga qytetarët e Kosovës, e që do të mundësojë lëvizjen e lirë në zonën Shengen, nga 1 janari 2024.

Po gjatë javës që po lëmë u arrestua drejtori i Korporatës Energjetike të Kosovës, Nagip Krasniqi, i dyshuar për keqpërdorim të pozitës dhe ushtrim ndikimi.

Ndërkaq, Kuvendi i Kosovës po vazhdon të përballet me mungesë kuorumi, ku si pasojë po dështon mbajtja e seancave plenare. Lidhur me këtë është treguar i ashpër edhe kryetari i Kuvendit, Glauk Konjufca.

Parlamenti Evropian i thotë po lëvizjes së lirë për qytetarët e Kosovës

Parlamenti Evropian i tha po të martën liberalizimit të vizave të Kosovës, duke e përmbyllur kështu këtë proces të stërzgjatur për qytetarët e Kosovës.

Miratimi i liberalizimit të vizave për Kosovën nga Parlamenti Evropian u bë pa votim pasi nuk kishte asnjë kundërshtim.

Kryetarja e Parlamentit Evropian, Roberta Metsola tha se nuk ka marrë asnjë propozim për të refuzuar qëndrimin e Këshillit të BE-së për liberalizimin e vizave dhe se do të shkojnë direkt me votim, shkruan Telegrafi.

Lexo po ashtu Finale - Parlamenti Evropian votoi pro liberalizimit të vizave për Kosovën, nga 1 janari 2024 udhëtojmë pa viza 

“… Nuk kam marrë asnjë propozim për të refuzuar qëndrimin e Këshillit të BE-së dhe asnjë amendament… Është miratuar qëndrimi i Këshillit dhe akti i propozuar është miratuar “, tha kryetarja e PE-së, Roberta Metsola.

Ndërkaq, të mërkurën në Strasburg është nënshkruar akti ligjor i Bashkimit Evropian për liberalizimin e vizave për Kosovën.

Eurodeputeti holandez, Thijs Reuten në një konferencë për media pas nënshkrimit të aktit ligjor për vizat, tha se më në fund qytetarët e Kosovës do të lëvizin pa viza drejt Evropës.

“Më në fund nënshkruam aktin ligjor që u mundëson qytetarëve të Kosovës të lëvizin lirshëm drejt BE-së pa viza. Më në fund udhëtimi drejt BE-së për pushime, vizita familjare, udhëtime biznesi do të jetë më e lehtë”, tha Reuten.

Ai shtoi se lëvizja pa viza drejt BE-së për qytetarët e Kosovës do të bëhet më së largu më 1 janar 2024.

Institucionet e BE-së kanë rënë dakord që kërkesa për të mos pasur viza për kosovarët do të zbatohet nga data e fillimit të funksionimit të Sistemi Evropian i Informacionit dhe Autorizimit për Udhëtimet (ETIAS) dhe në çfarëdo rasti, jo më vonë se 1 janari 2024.

Një muaj paraburgim për drejtorin e KEK-ut, Nagip Krasniqi, i dyshuar për korrupsion

Gjykata Themelore në Prishtinë ia ka caktuar masën e paraburgimit prej një muaji drejtorit të KEK-ut, Nagip Krasniqit, i arrestuar nën dyshimin për korrupsion.

Krasniqi dyshohet se ka kryer veprat penale “Keqpërdorim i detyrës zyrtare”, “Ushtrim ndikimi” dhe “Konflikt interesi”.

“Gjykata Themelore në Prishtinë – Departamenti Special ka vendosur lidhur me kërkesën e Prokurorisë Speciale për caktimin e masës së paraburgimit në çështjen penale për të pandehurin N.K për shkak të dyshimit të bazuar se ka kryer veprën penale Keqpërdorimi i pozitës apo autoritetit zyrtar nga neni 414 paragrafi 2 lidhur me paragrafin 1 të KPRK-së, Ushtrimi i ndikimit nga neni 424 paragrafi 1 i KPRK-së, Keqpërdorimi i pozitës apo autoritetit zyrtar nga neni 414 paragrafi 2 lidhur me paragrafin 1 të KPRK-së dhe Konflikti i interesit nga neni 417 paragrafi 2 lidhur me paragrafin 1 të Kodit Penal të Republikës së Kosovës”, thuhet në njoftim.

Lidhur me këtë, pati reagime të ashpra nga opozita parlamentare gjatë një seance në Kuvend.

Lexo po ashtu Akuzon Dejona Mihali: Prokuroria Speciale e Blerim Isufajt në veprim

Ndërkaq, kryeministri Albin Kurti, tha se kjo çështje [arrestimi] ka fakte, me të cilat merret sistemi i drejtësisë, dhe se nuk duhet “të zhvillohet gjyq në Kuvend për Nagip Krasniqin”.

“Është fakt se pati një gëzim opozitar për arrestimin e Nagip Krasniqit. Por, ky është fakt i opozitës nuk është fakt i çështjes. Ne e dimë që ka pasur shumë kryeshefa në KEK në të kaluarën, që ka pasur keqpërdorime marramendëse, por asnjëherë nuk janë trajtuar nga sistemi i drejtësisë, përkatësisht nga prokuroria”, u shpreh Kurti.

Mungesë e kuorumit në Kuvend, Konjufca: Kjo legjislaturë nuk e meriton të vazhdojë

Kuvendi i Kosovës ka paraparë që këtë të mërkurë të vazhdojë seancën plenare me pikat e papërfunduara gjatë muajve shkurt dhe mars, por në mungesë të kuorumit mbajtja e seancës dështoi dy herë.

Seanca ishte paraparë të fillojë në orën 10:00, por u shty për në orën 12:30 për shkak të mungesës së kuorumit.

Lidhur me këtë, kryeparlamentari Glauk Konjufca tha se legjislatura aktuale nuk e meriton të vazhdojë, për shkak të sjelljeve të papërgjegjshme të deputetëve.

Lexo po ashtu Dështimi i seancës, opozita: Kjo sjellje e papërgjegjshme e mazhorancës duhet të marrë fund

“Qysh po e shoh këtë sjellje të papërgjegjshme të disa deputetëve, nuk po mendoj se kjo legjislaturë e meriton me vazhdua…emrat ata që nuk kanë ardhur”, u shpreh Konjufca.

Edhe javën e kaluar në mungesë të deputetëve ka dështuar të mbahet seanca, e cila ishte paraparë për ditën e mërkurë. /Telegrafi/