Ushtria izraelite thotë se e ka ndarë Gazën në dysh

Një zëdhënës i Forcave të Mbrojtjes të Izraelit (IDF) i tha CNN se forcat e saj po lëvizin përpara drejt qytetit të Gazës, të cilin ai thotë se ushtria izraelite e ka rrethuar që kur arriti në brigjet e Gazës të dielën.

“Veriu dhe jugu (i Gazës) janë shkëputur nga njëri-tjetri dhe janë nën kontrollin e IDF-së”, tha nënkoloneli Peter Lerner për CNN të hënën.

Kjo “në të vërtetë do të thotë se ne po ecim përpara drejt qytetit të Gazës, ne kemi rrethuar qytetin e Gazës dy ditë më parë dhe ne po ecim përpara”, shtoi Lerner.

Duke e përshkruar qytetin e Gazës si “kështjellën e aktiviteteve terroriste të Hamasit”, ai tha se IDF është e vendosur dhe dëshiron të shkatërrojë grupin militant.

Lexo po ashtu SHBA-ja "do të goditet fort" nëse nuk zbaton armëpushimin në Gaza, paralajmëron Irani

Komentet e Lerner erdhën pasi kolegu i tij, zëdhënësi i IDF-së, adm. Daniel Hagari, tha se trupat izraelite e kanë ndarë Gazën në dy territore.

“Në thelb sot ekziston një Gaza veriore dhe një Gaza jugore…”, tha Hagari të dielën.

Ai pretendoi se IDF do të “lejojë një korridor në mënyrë që banorët e Gazës veriore dhe qytetit të Gazës të lëvizin drejt jugut”.

CNN shkruan se ka dokumentuar më parë se civilët palestinezë janë vrarë nga sulmet izraelite rreth zonave të evakuimit, duke nënvizuar realitetin se zonat e evakuimit dhe alarmet paralajmëruese nga IDF nuk kanë garantuar sigurinë për civilët në Rripin e Gazës me popullsi të dendur.

Ndërkohë, zyrtarët e të drejtave të njeriut kanë thënë se urdhri i Izraelit për evakuimin e civilëve mund të shkelë ligjin ndërkombëtar. /Telegrafi/