Ukraina shpall “misionin luftarak” të përfunduar në qytetin e rrethuar të Mariupolit

Forcat ukrainase kanë përfunduar “misionin e tyre luftarak” në qytetin e rrethuar të Mariupolit, sipas një deklarate nga ushtria e këtij vendi.

Sipas mediave të huaja, përcjell Telegrafi, komandantët e njësive të vendosura në fabrikën masive të çelikut të qytetit Azovstal janë urdhëruar “të shpëtojnë jetën e personelit të tyre”, thuhet gjithashtu në deklaratën e Shtabit të Përgjithshëm të Forcave të Armatosura të Ukrainës, shkruan CNN, përcjell Telegrafi.

Kështu, thuhet më tej, qindra njerëz u evakuuan të hënën nga uzina e çelikut, “streha” e fundit në një qytet që ishte bërë simbol i rezistencës ukrainase nën bombardimet e pamëshirshme ruse.

Zëvendësministrja e Mbrojtjes e Ukrainës, Hanna Malyar, e përshkroi operacionin e evakuimit në një deklaratë të veçantë, duke vënë në dukje se disa forca ukrainase mbeten në Azovstal.

Lexo po ashtu Ushtarët ukrainas po largohen nga fabrika e çelikut Azovstal me dhjetëra autobusë

“Pesëdhjetë e tre persona të plagosur rëndë u evakuuan nga Azovstal në një institucion mjekësor në Novoazovsk për kujdes mjekësor”, ka bërë të ditur ajo. “211 persona të tjerë u dërguan në Olenivka përmes korridorit humanitar”.

Një “procedurë shkëmbimi” do të shohë që të evakuuarit të kthehen në shtëpi, tha gjithashtu Malyar.

“Ukraina ka nevojë për heronjtë ukrainas të gjallë”, tha të hënën presidenti ukrainas Volodymyr Zelensky në një deklaratë për evakuimin, duke falënderuar ushtrinë dhe negociatorët ukrainas, Komitetin Ndërkombëtar të Kryqit të Kuq dhe Kombet e Bashkuara.

“Dita e 82-të e mbrojtjes sonë po përfundon. Një ditë e vështirë. Por kjo ditë, si gjithë të tjerat, synon pikërisht shpëtimin e vendit dhe popullit tonë”, tha Zelensky.

Lexo po ashtu Dikur qytet shumë i zhvilluar, sot vetëm rrënoja – si është jetuar në Mariupol para pushtimit rus në Ukrainë?

Ministria ruse e Mbrojtjes kishte thënë më herët se ishte vendosur një armëpushim për të lejuar kalimin e ushtarakëve të plagosur ukrainas, sipas agjencisë shtetërore të lajmeve RIA Novosti.

Mariupol, një qytet port në Detin Azov, ka qenë skena e disa prej luftimeve më intensive në Ukrainë që kur Rusia nisi pushtimin e saj në fund të shkurtit.

Shumë civilë tashmë janë evakuuar. Por luftëtarët ukrainas në qytet, në prill, ishin zotuar të “luftojnë deri në fund”, pavarësisht se ishin të rrethuar, me municione të pakta dhe në numër më të madh nga forcat ruse.

Regjimenti Azov i vendit lëshoi gjithashtu një deklaratë të hënën duke thënë se “i gjithë garnizoni i Mariupolit” po zbatonte urdhrat për të shpëtuar jetë. /Telegrafi/