U mbajt eventi “Krijimi i përmbajtjes për audiencë globale nga Kosova”, organizuar nga HaPiTe

HaPiTe është rikthyer me organizimin e ngjarjeve, duke sjellë kësaj radhe diskutimin mbi mundësitë dhe sfidat e krijimit të përmbajtjes nga Kosova për audiencë globale.

Eventi u mbajt këtë të premte, më 21 korrik, në hapësirat e HaPiTe në Prishtinë.

Të ftuarit, Arbër Musliu dhe Roni Shehu ndanë me të pranishmit përvojën dhe këshillat për përmbajtje të suksesshme.

Musliu i cili është content/copywriter në Inside.com, tregoi disa hapa që duhet ndjekur për të krijuar një përmbajtje, e cila ka impakt tek audienca.

“E sofistikuara nuk ka nevojë që të jetë e komplikuar” – është motoja e tij.

Ai sugjeroi të gjithë ata që shkruajnë përmbajtje për audiencë globale që çdo herë të nisen nga perspektiva e lexuesit.

Ndërsa, Roni i cili është udhëheqës i krijimit të përmbajtjes në Manaferra, tregoi se si kjo kompani ka arritur që përmes përmbajtjeve cilësore të fitojë klientë nga vende të ndryshme të botës.

Ai po ashtu shpalosi disa nga strategjitë dhe hapat që duhet ndjekur për të krijuar përmbajtje të suksesshme.

Hapësirat e HaPiTes kanë qenë nikoqire edhe të eventeve tjera, ku mblodhën bashkë profesionistë të fushave të ndryshme. Në eventin e fundit u fol për fillimin e një karriere në Freelancing, në të cilin ishin folës Riard Rexhepi dhe Granit Selimaj, freelancerë të suksesshëm.

Eventi i parë, i cili edhe shënoi hapjen e HaPiTes, u organizua në kuadër të Javën Globale të Ndërmarrësisë. Valon Canhasi (Hallakate), Gentian Lluka (Telegrafi), Faton Sopa (Manaferra) dhe Benjamin Kolenović (Growzillas), folën për nisjen e agjencionit të marketingut digjital.

HaPiTe u themelua nga Hallakate, Pixels dhe Telegrafi, me qëllim që të organizohen mbledhi e ngjarje për komunitetin, për të krijuar rrjetizim e diskutuar tema me interes të përbashkët. Po ashtu, kjo hapësirë është e qasshme edhe për organizatat dhe kompanitë që mbajnë punëtori, konferenca dhe organizime te tjera.