Turqia thërret ‘për sqarime’ ambasadorin e Suedisë në Ankara për shkak të “përmbajtjes së publikuar në transmetuesin publik” të vendit të tij

Ministria e Jashtme e Turqisë ka ftuar të mërkurën ambasadorin e Suedisë në Ankara për shkak të siç është thënë, “përmbajtjes anti-Turqi të publikuar në transmetuesin publik” të vendit të tij.

“Paturpësia, vërejtjet e shëmtuara dhe pamjet në televizionin shtetëror suedez kundër Turqisë dhe presidentit të saj janë të papranueshme”, citohet t’i ketë thënë ministria turke, ambasadorit Staffan Herrström, duke shtuar se një përmbajtje e tillë nuk mund të vlerësohet nën sferën e lirisë së shtypit apo të shprehjes, përcjell Telegrafi.

Sipas portalit Aydinlik.com.tr, televizioni shtetëror suedez SVT bëri një transmetim që tallte presidentin Erdogan dhe e ofendonte atë. Transmetimi paraqiste simpatizantin e PKK-së, Kadir Meral që jetonte në Suedi.

“’Erdogan, si ka mundësi që një turk si ty nuk ka flokë? Ju vini nga një vend ku të gjithë shkojnë dhe bëjnë një transplant flokësh…’. Deklaratat e mëposhtme u përdorën në programin në SVT, në të cilin anëtarët e PKK-së që Turqia kërkon ekstradimin u përcaktuan si ‘aktivistë’”, shkruan ky portal.

Incidenti vjen ndërsa zyrtarë të ministrisë së drejtësisë nga Turqia dhe Suedia takohen në Ankara për bisedime dy-ditore për të diskutuar bisedimet teknike mbi “mërgimin e terroristëve” sipas një marrëveshjeje trepalëshe që do t’i mundësojë vendit nordik të anëtarësohet në NATO.

Siç thuhet më tej, të dy delegacionet diskutuan kërkesat e Ankarasë “për ekstradimin e terroristëve”, duke përfshirë “ata nga grupi terrorist PKK dhe grupi terrorist Gylenist (FETÖ)”.

Suedia dhe Finlanda aplikuan zyrtarisht për t’u anëtarësuar në NATO në qershor, një vendim i nxitur nga lufta e Rusisë kundër Ukrainës.

Megjithatë, Turqia ka shprehur kundërshtime, duke kritikuar vendet “për tolerimin dhe madje mbështetjen e grupeve terroriste”.

Ndërkohë një memorandum trepalësh në samitin e NATO-s në Madrid, i nënshkruar midis vendeve në qershor, përcakton se Finlanda dhe Suedia nuk do të ofrojnë mbështetje “për degët siriane të PKK-së, YPG-në dhe PYD-në ose për Grupin Terrorist Gylenist (FETÖ) – grupi që qëndron pas grushtit të shtetit të dështuar në vitin 2016”. /Telegrafi/