Tubimi Kombëtar i ekstremit të djathtë të Francës ende kryeson përpara zgjedhjeve

Partia e ekstremit të djathtë të Francës, Tubimi Kombëtar (RN) dhe aleatët e saj shihen duke udhëhequr raundin e parë të zgjedhjeve parlamentare të vendit me 35.5 për qind të votave, sipas një sondazhi të publikuar të dielën, shkruan Reuters.

Sondazhi Ipsos – i kryer për gazetën Le Parisien dhe Radio France në 19-20 qershor – tregoi aleancën e krahut të majtë Fronti i Ri Popullor (NPF) në vendin e dytë me 29.5 për qind të votave.

Aleanca centriste e presidentit Emmanuel Macron, u pa në vendin e tretë, duke fituar 19.5 për qind të votave. Shkalla e pjesëmarrjes shihet në mes 60 dhe 64 për qind, që do të ishte shumë më e lartë se 47.5 për qind e parë në zgjedhjet e fundit të përgjithshme në qershor 2022.

Kryesimi i RN në sondazhet përpara zgjedhjeve që do të zhvillohen në dy raunde, më 30 qershor dhe 7 korrik, nuk ka gjasa të fitojë një shumicë absolute, transmeton Telegrafi.

Në një sondazh të veçantë të Ipsos, të publikuar nga Financial Times, Tubimi Kombëtar shihet si më i besueshmi kur bëhet fjalë për menaxhimin e ekonomisë dhe financave publike.

Sipas sondazhit, 25 për qind e të anketuarve i besojnë më shumë RN-së së Marine Le Pen për të marrë vendimet e duhura për çështjet ekonomike, kundrejt 22 për qind për Frontin e Ri Popullor dhe 20 për qind për aleancën e Macron. /Telegrafi/