Shërbimi hungarez i Radios Evropa e Lirë, Szabad Europa, ndërpreu aktivitetin pasi administrata e presidentit të SHBA-së Donald Trump njoftoi se nuk do ta financonte më median.
Në një deklaratë duke njoftuar përfundimin e operacioneve të saj, Szabad Europa tha se kishte “punuar me përkushtim për t’u ofruar lexuesve hungarezë gazetarinë më të mirë dhe informacionin objektiv”.
"Ju falënderojmë për besimin, interesin dhe mbështetjen që kemi marrë nga publiku ynë", thuhet në deklaratë, duke shtuar se artikujt e saj do të jenë ende të disponueshëm në internet.
Shërbimi hungarez u ndërpre në vitin 1993, por u rikthye në vitin 2020 pasi Agjencia e Shteteve të Bashkuara për Median Globale (USAGM), një agjenci federale e pavarur, dhe Kongresi i SHBA-së miratuan rilansimin e tij në përgjigje të rënies së ndjeshme të lirisë së medias në Hungari nën kryeministrin Viktor Orban.
Mbyllja e Szabad Europa erdhi në një kohë kur administrata Trump ka bërë shkurtime të mëdha në transmetuesit ndërkombëtarë si Radio Free Europe/Radio Liberty dhe Zëri i Amerikës, si dhe në transmetuesit publikë vendas PBS dhe NPR.
Kari Lake, të cilën Trump e emëroi këshilltare të lartë të USAGM, informoi Kongresin në një letër më parë këtë muaj se agjencia nuk do të financonte më Szabad Europa, duke shkruar se operacionet e saj në Hungari "nuk ishin në përputhje me interesat kombëtare të SHBA-së" dhe se ato "minonin" politikën e jashtme të Trump.
Në një postim në X dy ditë më vonë, Lake shkroi se “Globalistët janë më se të mirëpritur të urrejnë aleatin tonë Viktor Orbán”.
"Ata nuk kanë të drejtë të përdorin paratë TUAJA për të destabilizuar regjimin hungarez nëpërmjet programeve të financuara nga taksapaguesit në Szabad Europa. Ne po i japim fund kësaj", shkroi ajo. /Telegrafi/
