Mbrojtësi francez Axel Disasi pritej të largohej nga Chelsea gjatë afatit kalimtar të verës, por klubi nuk arriti ta transferonte për shkak të një rregulli pak të njohur.
Disasi kaloi gjysmën e dytë të sezonit të kaluar në huazim te Aston Villa, dhe ndonëse arriti të marrë minuta të vlefshme me skuadrën nga Birmingham, qendërmbrojtësi nuk arriti të sigurojë një largim gjatë verës.
Ish-klubi i tij, Monaco, shfaqi interes në momentet e fundit për ta rikthyer 27-vjeçarin në Stade Louis II, por një rikthim në Ligue 1 në ditën e fundit të afatit kalimtar u bllokua nga FIFA.
Kjo për shkak se Chelsea e kishte plotësuar tashmë kuotën e lejuar të huazimeve ndërkombëtare, sipas rregullave të reja të FIFA-s për huazimet.
Nicolas Jackson kompletoi një huazim që u shty dhe u kthye disa herë ndaj Bayern Munich pikërisht në ditën e fundit të afatit kalimtar, dhe kjo e bëri të pamundur huazimin e Disasit në Monaco.
Si pasojë, Disasi do të mbetet jashtë planeve të Enzo Marescas, me mbrojtësin që është futur në të ashtuquajturën “bomb squad” në Londrën Perëndimore, një grup lojtarësh të përjashtuar plotësisht nga skuadra e parë në ‘Stamford Bridge’.
Chelsea është e hapur për largimin e tij, me një transferim të mundshëm në janar, dhe pavarësisht se ishte afër rikthimit te Monaco këtë verë, Disasi po tërheq interes edhe nga klubet e Ligës Premier.
Sipas CaughtOffside, dy klube angleze, Crystal Palace dhe West Ham, po e monitorojnë nga afër situatën e tij te Chelsea./Telegrafi/
