Tragjedia në autostradën “Ibrahim Rugova” – kërkohen masa më të ashpra nga organet kompetente

Kryetari i Gjakovës, Ardian Gjini ka reaguar pas aksidentit tragjik në Prizren ku humbën jetën tre qytetarë të cilët ishin nga komuna e Gjakovës.

Gjini në një postim në Facebook, ka shkruar se është jashtëzakonisht i pikëlluar nga ky lajm.

“Jam jashtëzakonisht i pikëlluar nga lajmi për ndarjen e hershme nga jeta të tre djemve të ri nga Gjakova. Kjo ngjarje tragjike ka goditur rëndë 3 familje, por dhimbje për këtë humbje ka sot secili prej nesh. Në emër të qytetarëve të Gjakovës ngushëlloj familjet Syla, Delija dhe Bibaj për humbjen e bijve të tyre”, ka shkruar Gjini.

Edhe ish-kryetarja e kësaj komune, deputetja e LVV-së, Mimoza Kusari-Lila ka reaguar pas kësaj ngjarje tragjike.

Kusari-Lila ka shkruar se tri vdekje të shkaktuara nga papërgjegjësia dhe veprimi i jashtëligjshëm në trafik mbrëmë, thërrasin për veprime të menjëhershme dhe masa të ashpra nga organet kompetente.

Lexo po ashtu Policia: Tre viktimat e aksidentit në Prizren u goditen nga vetura – arrestohet i dyshuari

“Lordi Syla, Molos Delija dhe Nue Bibaj janë viktimat e fundit të aksidentit tragjik mbrëmë në autostradën “Ibrahim Rugova”. Ata humbën jetën nga papërgjegjësia e tjerëve deri sa kishin dalë të shikonin garat me vetura të cilat jashtë ligjit ishin organizuar në autostradë.

Organizime dhe veprime të ngjashme, duhet rreptësishtë të ndalen dhe masa të ashpra të ndermirën menjëherë.  Lordi, Molosi dhe Nue nuk mund të kthehen më në jetë, por të gjithë duhet angazhuar që jetë tjera të shpëtohen. Ngushëllime familjeve Syla, Bibaj dhe Delija dhe gjithë miqve të djemve të ndjerë”, ka shkruar Kusari-Lila.

Ndryshe, Policia e Kosovës ka njoftuar se mbrëmë në autostradën “Ibrahim Rugova”, ku tre këmbësorë janë goditur për vdekje nga një shofer i cili ka humbur kontrollin mbi veturë.

“Gjatë ngasjes në autostradë i dyshuari kosovar dyshohet se ka humbur kontrollin mbi veturën dhe për pasojë ka goditur tre persona meshkuj kosovar-këmbësorë. Si pasojë, tre personat e goditur kanë humbur jetën, ndërsa tre të tjerë kanë pësuar lëndime dhe janë dërguar për tretman mjekësor. Në vendin e ngjarjes ka dalë edhe prokurori i rastit dhe me vendimin e tij (tre) trupat e pajetë pasi është konstatuar vdekja e tyre nga ekipi mjekësor, janë dërguar në IML për obduksion”, thuhet në njoftimin e policisë. /Telegrafi/