Torta e famshme e Dubait – shije unike, përgatitje e lehtë dhe pa pjekje!

Nëse jeni fans i çokollatës virale të Dubait, kjo tortë është hapi i radhës që nuk duhet ta humbni. Thjeshtësi, shije dhe stil – gjithçka që ju duhet për të bërë përshtypje këtë verë!

Nëse nuk gjeni petë kadaifi, mos u shqetësoni – mund t’i përgatisni edhe vetë në shtëpi.

Përbërësit:

• 400 g petë kadaifi
• 2 lugë gjelle gjalpë të shkrirë
• 1,5 filxhanë krem fëstëkësh
• 1-2 lugë gjelle tahini
• 150 g qumësht i kondensuar
• 200 ml krem pana
• 1 lugë çaji ekstrakt vaniljeje
• 500 g djathë krem (ose maskarpone)
• 80 g krem pana
• 200 g çokollatë (qumështi ose e zezë)

Përgatitja:

Në një tigan, thekni petët e grira me gjalpë derisa të bëhen krokante. Lërini të ftohen, pastaj shtoni krem fëstëkësh dhe tahinin, përziejini mirë dhe shpërndajeni si bazë në një formë.

Në një enë tjetër, rrihni djathin krem me qumështin e kondensuar, më pas shtoni panën dhe ekstraktin e vaniljes. Rrihni derisa të bëhet një krem i trashë dhe i butë, dhe vendoseni mbi bazën me kadaif.

Për shtresën e çokollatës, ngrohni panën, shtoni çokollatën dhe përziejeni derisa të shkrihet krejtësisht. Hidhni kremin mbi tortë dhe vendoseni në frigorifer për të paktën 6 orë.

Dekorimi?

Krem fëstëkësh, fëstëkë të bluar ose edhe copa çokollate – në dorën tuaj është ta bëni edhe më të bukur.

Si të bëni vetë kadaifin:

Përzieni 9 të verdha vezësh, një vezë të plotë dhe 300–400 g miell. Formoni një brumë të fortë dhe holloni në fletë të holla. Priteni në shirita të hollë dhe lërini të thahen përpara përdorimit.

Shijojeni, – transmeton Telegrafi.