Testimi i raketave – publikohen imazhe të cilat Koreja e Veriut thotë si i mori nga hapësira

Koreja e Veriut ka publikuar fotografi për të cilat thotë se janë marrë nga lëshimi i raketës më të fuqishme në pesë vjet.

Sipas BBC, përcjell Telegrafi, fotot e pazakonta të marra nga hapësira tregojnë pjesë të gadishullit Korean dhe zonave përreth.

Pheniani konfirmoi të hënën se kishte testuar një raketë balistike me rreze të ndërmjetme Hwasong-12 (IRBM).

Me fuqinë e saj të plotë, ajo mund të udhëtojë mijëra milje, duke i vendosur zona si territori i SHBA-së Guam në “distancë goditëse”.

Dhe testi i fundit ka ngritur sërish alarmin në komunitetin ndërkombëtar.

Pheniani ka kryer një numër rekord prej shtatë lëshimesh raketash vetëm gjatë muajit të kaluar – një stuhi intensive aktiviteti që është dënuar ashpër nga SHBA, Koreja e Jugut, Japonia dhe vende të tjera.

OKB-ja e ndalon Korenë e Veriut nga testet e armëve balistike dhe bërthamore dhe ka vendosur sanksione të rrepta. Por shteti i Azisë Lindore rregullisht kundërshton ndalimin.

Çfarë ndodhi në lëshimin e Hwasong-12?

Koreja e Jugut dhe Japonia ishin të parat që raportuan lëshimin të dielën pasi e zbuluan atë në sistemet e tyre antiraketë.

Ata vlerësuan se ajo kishte fluturuar në një distancë të moderuar për një IRBM, duke mbuluar një distancë prej rreth 800 km (497 milje) dhe duke arritur një lartësi prej 2,000 km përpara se të ulej në ujërat jashtë Japonisë.

Me fuqi të plotë dhe në një trajektore standarde, raketa mund të udhëtojë deri në 4000 km.

Koreja e Veriut konfirmoi lëshimin e raketës të hënën përmes raporteve të mediave të saj shtetërore.

Testet e tilla të vendit zakonisht zbulohen nga media shtetërore një ditë pas ndodhjes së tyre. /Telegrafi/