Një kapitull i veçantë bashkëpunimi sportiv është shkruar në tatamin e Kosovës, ku mjeshtre të njohura të xhudos nga Japonia kanë zhvilluar stërvitje me ekipin kosovar.
Në një seancë intensive dhe të pasur me teknikë, kampionet botërore Misato Nakamura dhe Nami Nabekura, së bashku me trajneren e mirënjohur Tomoe Yokoyama, ndanë përvojat e tyre me sportistët kosovarë, duke sjellë në Prishtinë frymën dhe precizionin e xhudos japoneze.
Stërvitja, e zhvilluar në një atmosferë profesionale dhe miqësore, u drejtua nga trajneri i ekipit kombëtar të Kosovës, Driton Kuka, i cili shfrytëzoi këtë rast për të shkëmbyer njohuri dhe për të thelluar bashkëpunimin me një nga shkollat më prestigjioze të xhudos në botë.
“Mjeshtëri, teknikë dhe përkushtim në çdo lëvizje” – kështu është përshkruar nga të pranishmit intensiteti dhe cilësia e këtyre seancave, ku u theksua rëndësia e zhvillimit të vazhdueshëm teknik dhe e përvojës ndërkombëtare për garuesit e rinj.
Për Kosovën, kjo vizitë përfaqëson më shumë sesa një seancë stërvitore – është një dëshmi e respektit ndërkombëtar që xhudoja kosovare gëzon dhe një hap i rëndësishëm drejt përgatitjes për ngjarjet madhore. /Telegrafi/
