Superliga e Kosovës vazhdon sot me tre ndeshje, pretendentët për titull zbresin në fushë

Xhiro e 11-të në Albi Mall Superligën e Kosovës në futboll ka filluar ditën e djeshme me dy ndeshje që u zhvilluan, derisa sot në program janë tre të tjera.

Në fakt ditën e sotme tre skuadrat pretendente për titullin e kampionit Ballkani, Drita dhe Llapi do të zbresin në fushë për të luajtur ndeshjet e tyre.

Padyshim që ndeshja më interesante pritet të zhvillohet në stadiumin ’18 qershori’ në Klinë, ku Dukagjini është nikoqir i Llapit.

Vendasit në këtë takim vijnë pas fitores ndaj Malishevës dhe synojnë që të vazhdojnë njësoj për tu ngritur në renditjen tabelare.

Në anën tjetër llapjanët pas humbjes nga Drita kërkojnë këndelljen në Klinë.

Kampioni në fuqi i Kosovës, Ballkani do të udhëtoj drejt Drenasit për tu përballur me Feronikelin ’74.

Skuadra e Xhengis Rexhepit synon të shkaktojë befasi në këtë duel, derisa Ballkani kërkon vazhdimësi të fitoreve.

Drita është skuadra më në formë, ku ka marrë pesë fitore radhazi dhe pret Lirinë e Prizrenit para tifozëve të saj.

Gjilanasit kanë për synim të vazhdojnë me fitore, derisa prizrenasit pas pesë humbjeve radhazi kërkojnë të rikthehen te rezultatet pozitive.

Të tre duelet e ditës së sotme në Albi Mall Superligë fillojnë nga ora 13:00. /Telegrafi/