Skuadrat angleze e duan transferimin e Konates, zbulohet klauzola e mbrojtësit francez

Ibrahima Konate mund të transferohet në elitën e futbollit anglez Ligën Premier gjatë afatit kalimtar të janarit.

Ka qenë gazeta prestigjioze gjermane Sport Bild që ka raportuar për interesimin e katër klubeve të mëdha angleze për të.

Mbrojtësi i talentuar francez prej katër vitesh është pjesë e RB Leipzig dhe ka shkëlqyer me paraqitjet e tij.

Skuadrat e mëdha angleze si Arsenal, Liverpool, Manchester United dhe Tottenham Hotspur duan transferimin e tij qysh në afatin kalimtar të janarit.

Bild ka zbuluar se mbrojtësi ka një klauzolë largimi prej 40 milionë eurove dhe nëse ndonjëra nga skuadrat e interesuara për të e paguan këtë shumë, mund ta transferon Konaten qysh në janar.

21-vjeçari ka një kontratë deri në verën e vitit 2023 me RB Leipzig, por ai ndihet i gatshëm për ta bërë hapin e madh në karrierë.

Liverpooli shihet si skuadra favorite për transferimin e lojtarit pasi Jurgen Klopp e pëlqen jashtëzakonisht shumë francezin.

Kampioni në fuqi i Anglisë ka nevojë urgjente për transferimin e një mbrojtësi qendror dhe nuk përjashtohet mundësia që brenda dy ditëve të fundit të afatit kalimtar ta bëjë një gjë të tillë.

Konate këtë edicion ka zhvilluar 12 ndeshje me Leipzigun ku ka shënuar edhe një gol. /Telegrafi/